Unang Misa sa bag-ong gi-turn over nga GKK sa San Roque Parish Malabog

June 11, 2022, nagmalampuson ang unang misa ni Rev. Fr. Arnold Balaquinto, kura paroko sa San Roque Parish Malabog sa GKK Birhen sa Kasilak nga nahimutang sa Purok Tagbao, Brgy. Tamugan, Marilog Dist., Davao City. Ang maong GKK nahisakop kaniadto sa parokya sa The Most Sacred Heart of Jesus Parish of Calinan. Dili babag ang kalisod sa dalan ug ang pagtabok sa mga naagiang sapa padulong sa maong GKK, daghang mga parokyano ug mga pangulo ang nangadto. Niining panahona gihimo ni Fr. Arnold ang pag-send forth sa mga pangulo ug pagpanaad sa mga myembro. Ang maong GKK sa pagkakaron sakop na sa zone-6 sa San Roque Parish-Malabog.

Gipaila-ila usab ang tanang mga coordinator sa sona ug parokya kada ministriya. Unang higayon nga nagmisa ang kura paroko nga nakatsinelas tungod nabasa ang iyang sapatos sa pagtabok sa sapa. Si Fr. Arnold nanaad nga sa pagbalik niya sa umaabot nila nga kapistahan puhon sa bulan sa Septyembre magdala siya og duha ka sako nga tsinelas ug kini iyang iapod-apod sa mga myembro. Mapasalamaton usab ang ilang PSK nga si Mr. Marcial Dosmanos nga bag-o pa sa katungdanan iyang gipasalig nga sa umaabot nga panahon adunay kalamboan nga mahitabo. Sa pagkakaron adunay 38 ka myembro ang maong GKK. (Noralyn Largo | GKK SocCom Sona 6)