Ulitawo Gihapon

Dear Ate Emz,

Ulitawo pa ako magpa hangtod karon sa edad nga 45 anyos. Nagtoo ako nga ang kaminyoon kinahanglan dili dali-dalion. Apan sa akong tan-aw magpabilin akong ulitawo. Gustohon ko man nga magminyo apan wala tuguti sa kapalaran.

Kaniadto sa medyo bata-bata pa wala akoy nahimong seryoso nga relasyon. Happy go lucky kaayo ug kampante nga dili mawad-an og partner sa kinabuhi. Kung magbulag man dili madugay duna dayon lain kapuli. Mura ba og sanina nga daghan og reserve. Garbo pa nga ipang hambog sa mga higala ug barkada.

Hangtod nga mi expire na ug ako nag inusara. Akong mga kababata ug mga barkada duna nay mga kaugalingong pamilya. Magkatapok man kami magbarkada panagsa pero limitado ug dili pareho sa una tungod dunay mga tagsa-tagsa na nga kabilinggan sa kinabuhi.

Ulahi na ba ang tanan kung magsugod ako sa sinugdanan? Duna pa bay igong panahon sa paghimo niini?

Daghang Salamat,
Nat2x

* * * * * *

Dear Nat2x,

Matod pa sa usa ka philosopher nga si Soren Kierkegaard, ang kinabuhi masabtan ra sa paghinumdon sa mga nangagi, ug tun-an ang tanan, pagtuki niini aron mas makat-on kita bahin sa atong kaugalingon ug sa uban; ug gamiton kining mga nakat-onan sa kinabuhi sa umaabot.

Kung balikan ang imong mga kasinatian sa love life, tingali sa panahon sa imong kabatan-on, ang imong matang sa relasyon mahulagway nga “collect and select”. Hinuon, kung mobalik ka sa imong mga nangaging kasinatian, sigurado ko nga naa kay mga cherished memories ug bililhon nga mga leksyon nga nakat-unan.

Usahay ang usa ka tawo adunay kalagmitan nga maanod na lang sa kinabuhi; ug sa panahon nga makaamgo kini, 45 na ka tuig diay ang edad! Sa kasamtangan sa imong pangedaron nga 45 anyos, nagpabilin ka nga ulitawo gihapon, ug tingali makasulti ka nga “hinuon, mas maayo nga nahigugma ug nawad-an, kaysa wala gyud nahigugma sa ngatanan”, di ba? Ug matod pa nimo, “hangtod ni expire na ug ako nag inusara”. Sa pagkatinuod, dili gyud nato mapugngan ang paglabay sa panahon, kita motubo sa edad.

Ulahi na ba ang tanan kung magsugod ako sa sinugdanan? Kini nga pangutana usa ka hagit alang kanimo sa pagpamalandong. Ug pangutan-a ang imong kaugalingon kung unsa gyud ang gusto nimo buhaton sa imong kinabuhi. Baliki ang mga tumong nimo sa kinabuhi. Gusto ba nimo nga magpuyo sa kinabuhi pinaagi sa pagminyo? Pangitag asawa! Magpabiling ulitawo? Sa unsang pamaagi nga mas makahuloganon ang imong kinabuhi? Relihiyosong kinabuhi? Bisan asa ang imong pilion, kining tanan mga tawag sa pagkabalaan! Busa kinahanglan nimong mamalandong kung asa gyud ka gitawag sa Ginoo. Hinumdumi nga ang kaminyoon dili lamang ang direksyon sa kinabuhi. Busa, dili magpadala sa pressure sa uban kung hangtod karon wala ka pa nagminyo. Kay matod pa nimo, ang kaminyoon kinahanglan dili dali-dalion.

Kalabot niining pagpamalandong, naa koy kaila nga iya gyud giplano ang direksyon sa iyang kinabuhi pinaagi sa pagmugna sa iyang mga tumong. Sa iyang kaugalingong paningkamot ug determinasyon, gipalig-on niya nga humanon gyud ang iyang pag-eskwela, ug nakab-ot gyud niya kini sa edad nga 26 anyos. Apan kining iyang nahuman nga degree, gihimo lang niya nga lakang aron maka-ipon alang sa ikaduha nga propesyon nga iya gyud gidamgo nga makab-ot. Sa hinay-hinay samtang nagtrabaho sa adlaw ug nag-eskwela sa gabii, nilampos gyud siya ug nahuman niya kini sa edad nga 36 anyos! Ug dinha na sab siya nagsugod og mga lakang aron makab-ot na sab niya ang sunod nga damgo sa iyang kinabuhi. Iya gyud giubanan sa hugot nga pag-ampo kining mahinungdanong lakang tungod kay sumala sa iyang plano, magminyo siya sa edad nga 36 anyos. Apan medyo nilapas lang siya og gamay sa iyang plano tungod kay na minyo siya sa edad nga 37 anyos. Ang kaminyoon wala gyud gidali-dali…and the rest is history… Nagpadayon ang paglawig kauban ang kapikas sa kinabuhi ug ang iyang pamilya.

Bahin sa imong kasinatian ug kahimtang karon, ayaw gyud kalimti ang pag-ampo aron malamdagan ka kung unsang state of life ka ginatawag sa Ginoo. Pray, pray, and pray more. Ask the assistance of the Holy Spirit to enlighten you and to guide you along the way that you may choose the path He wants you to take. Whatever you choose, He will bless you and pour the necessary graces you need in your journey as you glorify Him with your life.

Walk with Mary, our Lady of the Way, for she will always be by your side, to lead you and protect you under her mantle.

God bless you more.
Ate Emz