Tigpanalipod, Paglaom ug Inspirasyon: Pagpangandam sa ika-59 ka Tuig nga Kapistahan sa Sadepp-Agdao

“San Antonio de Padua: Atong Tigpanalipod, Paglaom ug Inspirasyon niining ika-59 ka tuig nga Atong Kapistahan.”

Ang kapistahan ni San Antonio de Padua sa Parokya sa Agdao hilabihang ginapangandaman nga kalihukan. Taliwala niining nagapadayong pandemya nga nasinati nagpabiling madasigon ang mga lideres sa mga Gagmayng Kristohanong Katilingban (GKK).

Ang yano nga pagsaulog sa ika-59 ka tuig, sama sa naandan adunay siyam ka adlaw nga pagpangandam sa Novena ug Santos nga Misa nga pagapangulohan sa mga nangaging kaparian sa parokya. Ug sa umaabot nga kapistahan karong Hunyo 13, ang mga eskedyul sa Santos nga Misa mao ang mosunod; sa buntag: 6:00 ug 8:00 ug sa hapon: 3:00 ang mangulo si Obispo George B. Rimando, D.D. ug sa 5:00 ang mangulo si Arsobispo Romulo G. Valles, D.D.

Usab gihagit sa Kura Paruko nga si Reberendo Padre Amado B. Arroyo, mao ang pag-ila sa matag parokyano kon kinsa si San Antonio de Padua, ang iyang kasinatian sa kinabuhi, mga milagro ug maayong binuhatan, ug sa gidaghanon nga nakapausab sa tibuok niyang kinabuhi. Busa, sa dili pa magsugod ang matag Santos nga Misa sa kapistahan karong Hunyo 13, adunay animation presentation ang ipagula.

Karong Hunyo 12, adunay panagtapok sa mga GKK Servant Leaders isip paghinumdom sa sinugdanan sa parokya sukad nga natukod kini niadtong tuig 1963. Gilangkuban kining panagtigom og mga pasundayag nga mga cultural presentations ug nagkalain-laing talento, ingon man ang paghatag ug mga sertipiko isip pagpasalamat sa mga sona ug aktibong GSLs isip pagtahan sa ilang kaugalingon diha sa pagpangalagad sulod sa ika-50 nga anibersaryo sa Basic Ecclesial Communities sa Arkidiyoses sa Dabaw ug mismo sa Parokya. Gisiguro sa mga myembro sa komitiba nga mapatuman gihapon ang mga luwasnong protokol isip pag-amping sa nagapadayong pandemya.

Gilauman nga pinaagi sa pangama ni San Antonio de Padua magpadayon ang mga parokyano nga mabulahan ug magiyahan samtang padayon magpasalamat sa mga gasa nga nadawat diin giila siya isip Tigpanalipod, Paglaom, ug Inspirasyon. (Justin Felicia | Sadepp – Agdao SoCCom)