Paghandom aron Adunay Kinabuhi!

Solemnidad sa Lawas ug Dugo ni Cristo (June 19, 2022)
Gen 14:18-20 / Ps 110:1, 2, 3, 4 / 1 Cor 11:23-26 / Lk 9:11-17

Si Hesus naghalad sa iyang kaugalingon didto sa Kalbaryo, aron pagluwas sa katawhan. Siya ang nahimong tigpataliwala sa Dios og sa katawhan nga nakasala. Gitawag ang iyang gibuhat nga “Bayad-Sakripisyo”. Ang bunga sa iyang sakripisyo mao ang atong kaluwasan nga nagpasabot nga nahibalik na pag-usab ang relasyon sa tawo ngadto Sa Dios.

Nagpadayon ang tawo sa pagkinahanglan sa bunga sa kaluwasan busa kinahanglan usab nga ang sakripisyo ni Hesus sination pag-usab diha sa sa pagka-anaa o present og aktibong paagi isip sakramento.

Mao kini ang milagrong nahitabo sa matag saulog nato sa Santos nga Eukaristiya diin atong gisaulog ang paghandom sa kasakit, kamatayon ug pagkabanhaw ni Kristo. Si Hesus mismo, kinsa sa katapusang panihapon naghimo niining katilngalahang paagi sa buhat sa kaluwasan nga panghitabo sa atong panahon. Siya usab ang nagsugo sa iyang mga tinun-an sa paghimo niini pag-usab “buhata kini sa paghandom Kanako.”

Kitang mga Katoliko seryosong midawat sa iyang mga pulong ug kon unsay buot ipasabot niini. Mao kini ang Misteryo sa Pagtuo! Kay ang Kaluwasan nga gihalad kanato sa Dios dili masulbad pinaagi sa Mathematics: one equals one, apan bunga kini sa dili masabtang gugma sa Dios ngadto sa mga makasasala. Ang bunga niining paghinumdom sa sakripisyo ni Hesus dili buhat sa tawo kundili buhat sa Dios.

Unsay atong gibuhat diha sa pagsaulog sa Santos nga Eukaristiya mao ang pagtuman sa gisugo ni Hesus nga siya mahimong ilimnon ug kalan-on (lawas ug dugo). Kining tanan usa ka hagit kanato nga magmalampuson, mapuno, mahingpit, mabusog sa kinabuhi. Mao kini ang gihisgutan sa Ebanghelyo diin “Nangaon ug nangabusog silang tanan, ” ug labaw pa, kay adunay napulog duha ka bukag nga salin. Ang napulog duha ka salin. nagkahulugan nga nadawat nila ang hingpit nga pagkabusog, nadawat nila ang hingpit nga kinabuhi. Walay laing makahatag kanato sa kinabuhi kundili siya lamang tungod kay ang matuod nga kinabuhi wala diha sa bahandi, sa gahom, sa awtoridad, ug sa mga butang kalibutanon. Ug walay laing makahatag niining matuod nga kahingpitan kundili si Hesus lamang. Busa, modangop kita sa Dios kanunay nga maoy naghatag kanato sa lawas ug dugo ni Kristo isip kalan-on sa kinabuhi ug ilimnon nga espirtuhanon, maato ang kahingpitan sa kinabuhing dayon. Amen!