Pagbunyag Ug Kasalan Sa Ika-52 Nga Kapistahan

Gisaulog sa GKK San Antonio de Padua sa sitio Lauan, Brgy Callawa ang ilang ika-52 nga kapistahan. Ang maong kapilya nahisakop sa San Alfonso Ma. de Ligouri Parish sa Mandug.

Mabulukon ang maong kapistahan tungod kay dungan niini gisaulog usab sa Arkidayosis sa Dabaw ang ika-50 nga anibersaryo sa BEC o Basic Ecclesial Community o mas nailhan nga GKK o Gagmayng Kristohanong Katilingban. Duyog usab sa pagsaulog sa maong pyesta ang pagdawat sa sakramento sa kaminyoon sa 5 ka pares sa mga magtiayon, ug pagdawat usab sa 7 ka mga kabataan sa sakramento sa bunyag.

Kini nahimong bililhon tungod kay napamatud-an nga nagkadako gayod ug nagkalambo ang mga GKK diri sa atong Arkidayosis. Ang maong luna nga gitukuran sa kapilya, gipanag-iyahan sa pamilyang Careon ug Bahinting sa tuig 1957. Nahimong produkto sa maong katilingban si Rev. Fr Maximo Bahinting ug ang bag-o lamang ni gradwar nga semarista nga si Sem. Antonio Manzo.

Ang Misa sa ilang kapistahan ug sa kasal gipangulohan ni Rev.Fr Jemasol Ortiz nga gi konsilebrahan ni Rev. Fr Maximo Bahinting nga mao ang nagsaulog sa sakramento sa bunyag. Uban ni Fr. Jojo ang 3 ka seminarian nga diin duha kanila bag-o lamang mi gradwar sa Teyolohiya, sila mao si Sem. Ranie Boy Pamplona, Sem. Francis Flores nga magpahigayon sa ilang community exposure sa mga GKK sa Parokya sa San Alfonso, ug si Sem. Dave Christian Catam-isan nga seminarian sa parokya.

Sulod sa homiliya, gipahinumdoman ni Fr. Jojo ang mga bag-ong magtiayon nga sundon pirmi ang mga pagtulon-an ni Kristo. Dungag pa niya, nga kung adunay dili pagkasinabtanay, dli na paabuton nga mu salop pa ang adlaw bag-o sila mag uliay ug kung makabuhat gani ug sala dli gayod mubalos gani magpaubos ug mangayog kapasayloan, iya usab gipahinumdoman sila nga dli kalimtan nga mangayog panabang sa Patron nga mao si San Antonio de Padua. Sa ulahi, iyang gi awhag ang mga miyembro sa GKK ug sa mga bagong kinasal nga muserbisyo gayod sa katilingban kay sumala sa Bibliya ang mangalagad sa isigkaingon nangalagad usab sa Ginoo.

Ang pagpamunyag sa pito ka mga bata gi pasiugdahan ni Fr. Max Bahinting diin iyang gisusi kung pila ka mga ginikanan ang kasado na ug mga dili pa, nasayran nga ubay-ubay sa mga ginikanan ang wa pa makasal. Gipahinumdoman sila ni Fr. Max nga kung mamahimo mudawat gayod sa sakramento sa kaminyoon. Dungag pa niya, dili nila kalimtan ang tahas nila isip usa ka ginikanan nga mao ang pagamuma sa ilang mga anak ug dalaon sila sa Ginoo kay ila kining katungod.

Sa ulahi, nagpasalamat ang PSK sa maong katilingban nga mao si Tita Bahinting sa mga GSL nga nag organisa sa maong kalihokan ug uban pang mga aktibidad sa ilang kapistahan. Nagpasalamat usab siya sa kura paroko sa pagtugot sa aktibidad ug hilabi na kay Rev Fr. Max Bahinting nga produktong pari sa maong GKK.

Ang maong pagbunyag ug kasalan unang higayon nga gisaulog sabay sa kapistahan sa ilang patron. (Jomar Narciso)