Pagbalik-lantaw sa kinabuhi ug misyon sa GKK sa Dabaw

Uban sa hilabihang kalipay ug tumang pagmaya, atong saulogon ang ika-50 ka tuig sa presensiya sa Gagmayng Kristohanong Katilingban (GKK) dinhi sa lokal nga Simbahan sa Dabaw! Sa atong pagsaulog, kita gigiyahan sa tema: “GKK, GASA SA DIOS SA DABAW, Nanag-uban sa Panaw sa Diwa sa Pagkapiniyalan, 50 Anyos na sa Misyon.”

Niadtong gitawag nga “liberation time” sa kasaysayan sa Pilipinas human sa second world war mga tuig late 1940’s hangtod 1960’s, ang Mindanao ilabina ang Dabaw, gitawag nga Land of Promise kon Yuta sa Saad, tungod kay daghang “Internal migrants” nga gikan sa Cebu, Bohol, Iloilo, Leyte, Samar, Negros ug mga taga-Luzon nga nanimpalad dinhi sa Dabaw kay mahatagan sila’g maayong kaugmaon og malambuong kinabuhi. Uban kanila ug sa ilang mga pamilya mao ang ilang tagsa-tagsa ka debosyon sa ilang mga patron, ilabina sa Santo Niño, San Roque, San Isidro Labrador, Inahan sa Kanunay’ng Panabang og uban pa. Aron padayon nga motubo og molambo ang ilang pagtuong Katoliko diha sa ilang mapadayunong debosyon sa mga Santos nga ilang gibalaan og gimahal, nagtukod sila’g mga kapilya nagkatapok sila, nag-ampo sa rosaryo, padayon nga nagdebosyon sa dala nila nga mga patron uban sa ilang mga pamilya ug mga silingan. Buhi ang pagtuo og malipayon sila sa ilang mapadayunong debosyon pagsaulog sa tinuig nga misa sa Kapistahan sa Patron sa Katilingban. Gani, miabot diri sa Dabaw gikan sa Negros ang debosyon sa Mahal nga Birhen Maria, ang Barangay Sang Birhen diin aduna silay pag-ampo sa nobena halad ngadto sa Mahal nga Birhen, pagrosaryo ug pagprosisyon nga dala nila ang imahen sa Mahal nga Birhen ug mga estandarte (emblems) nga nagrepresentar sa mga pundok sa mga pamilya nga miapil sa prosesyon. Nindot kaayo og makahuloganon ang maong debosyon sa mga pamilya nga sakop sa “Chapel community.” Kini nahimong preparasyon sa opisyal nga pagtukod sa GKK dinhi sa Dabaw.

Sa tuig 1971, nahimugso ang Unang Mindanao-Sulu Pastoral Conference (MSPC I), nga gipangulohan ni Arsobispo Lino Gonzaga sa Zamboanga. Ang MSPC, usa ka kahugpongan sa tanang mga Katolikong Obispo sa Mindanao, mga pinili nga mga pari, relihiyoso ug layko gikan sa mga Arkidayosesis, Dayosesis, Prelatures ug Apostolic Vicariates sa Mindanao. Sa MSPC I, nga gihimo dinhi sa Dabaw, ang tema: “Building Small Christian Communities.” Sa MSPC II, nga gihimo sa Cagayan de Oro, ang tema: “Self-Sustaining, Self-Nourishing and Self-Governing Communities.” Ang una ug ikaduha nga MSPC’s naghatag duso (thrust), kadasig ug hinay-hinay nga pagmugna ug paglig-on sa mga GKK dinhi sa Mindanao.

Dinhi sa Dabaw, opisyal nga gisugdan ang pagtukod sa GKK sa tuig 1971, og gisaulog nato ang ika-50 ka tuig karong tuiga, June 12, 2022, kapistahan sa Santisima Trinidad, ang atong perpektong modelo sa kahiusahan sa katilingban og usab kining Dominggoha, “National BEC/GKK Sunday nga gisaulog sa tibuok Pilipinas. Karon, aduna na kitay 1,656 ka mga GKK dinhi sa Dabaw. Kining mga GKK gibahin nato sa mga Pundok-banay (cluster of families), gikan sa 8 ngadto sa 15 ka mga pamilya matag pundok. Matag Pundok-banay nagapalambo sa GKK sa mga “values of communion, participation, co-responsibility and mission.” Sa kasamtangan, diha sa atong mga GKK, ang Espirituwalidad sa pagkapiniyalan gihatagan og importansiya diha sa mga pormasyon sa GKK aron ang diwa ug mithi sa pagkapiniyalan matisok, motubo og molambo sa GKK ilabina sa hinay-hinay nga pagwala sa “arancel system.”

Gihatagan og bili diha sa mapadayonong pormasyon ang “HALAD PASALAMAT” aron mahimong malipayon nga manggihatagon ang mga GKK apil ang mga kabus sa pagsuporta sa Misyon sa simbahan. Nagpadayon usab ang “synodal journey” o panag-uban sa mga panaw sa katawhan alang sa kalamboan sa malaumong simbahan.

Sa panahon sa unang mga Kristiyanos, diha sa Buhat sa mga Apostoles 2:46-47: “Nagpadayon sila (unang mga Kristiyanos) sa pagtigom matag adlaw didto sa Templo ug naghiusa… Gidayeg nila ang Dios og gikahimut-an sila sa katawhan. Ug matag-adlaw gidungagan sa Ginoo ang ilang pundok sa mga tawo nga nangaluwas.”

Importante gayod ang misyon diha sa pag-ampo, pagtudlo ug pag-alagad sa pagkahamtong sa pagtuo ug buhat diha sa GKK.

O Espiritu Santo, daghang salamat sa mga gasa og grasya gikan Kanimo nga among nadawat. Kini nakapalig-on kanamo sa among pagtuo, buhat og sa pagkamasangyawon. Kini among ampingan, amomahon og pabungahon sa among kinabuhi og sa mapadayunong misyon nga malipayon. Padayon GKK sa Dabaw! (Rev. Fr. Pedro P. Lamata | Director GKK Ministry Archdiocese of Davao)