Ika-26 Ka Tuig nga Kapistahan ni San Isidro Labrador Malampusong Gisaulog

Ang Gagmay’ng Kristohanong Katilingban (GKK) San Isidro Labrador, Ciudad de Esperanza (SIL-CDE) nagmalampuson sa pagsaulog sa ika-26 ka tuig nga Kapistahan sa among Mahal na Patron San Isidro Labrador niadtong Mayo 24, 2022. Gisaulog ang Santos nga Misa sa alas otso ang takna sa buntag diin gipangulohan ni Kura Paroko, Rev. Fr. Dionisio Tabiliran.

Sa daghang mga katuigan nga nanglabay adunay mga kabag-ohan diha sa pagkamadasigon, pagkamainampoon ug pagkamapaubsanon sa mga kaigsoonan sa katilingban.

Dili malikayan ang mga pagsulay niining Kristohanong kinabuhi pero diha sa mga pagsulay, nga diin kita sukdon sa Ginoo ilabi na sa kalig-on sa atong Pagtoo. Sa kasakit ug kalipay atong ihalad ang tanan sa atong Langitnong Amahan.

Busa dinhi sa among GKK SIL-CDE, kami mapasalamaton sa tanang Grasyang Makasantos nga among nadawat ug sa among mga kaigsoonan sa St.Mary of the Perpetual Rosary Parish ilabi na sa among Kura Paroko Rev. Fr. Dionisio Tabiliran, nga naghatag og panahon sa mga kalihukan nga nagdasig kanamo sa kanunay ilabi na niining panahon sa pandemya.

Tungod sa pagka-anaa sa atong Ginoong Hesukristo, sa atong Inahan sa Kanunay’ng Pagrosaryo ug pinaagi usab sa pangama ni San Isidro Labrador nga mabinantayon alang sa tanan.

Diha sa Iyang mga pag-ampo nagahambin kanato isip modelo sa pagka-mapaubsanon ug pagkamaalagaron nga diha ang Kahiusahan atong maangkon.

Dalaygon ang Dios sa kahangturan!

(Maria Dexie Calvo | GKK SoCCom)