Ika-15 nga Kapistahan sa Maria Mananabang sa mga Kristyanos Dacudao

Human sa duha ka tuig nga kamingaw tungod sa pandemya nagsugod na gayod sa pagbalik sa malipayong pagsaulog sa mga kapistahan ang simbahang Katoliko sa dakbayan sa Dabaw ug usa na niini ang parokya sa Maria Mananabang sa mga Kristyanos. Malampuson ug malipayong gisaulog ang ika-15 nga kapistahan sa maong parokya niadtong Mayo 24, 2022 nga nahimutang sa Dacudao, Calinan Davao City. Kini inubanan sa tema nga: “Santa Maria, Babaye sa Pagtoo, Gigasahan sa Ginoo aron Makapanghatag sa Katawhan sa Diyos.”

Gipangulohan ang Santos nga misa sa atong Halandong Arsobispo sa Davao, Romulo G. Valles, D.D. Inubanan sa kura paruko nga si Rev. Fr. Marcelino Benabaye SDB., salesianong mga pari ug ang mga kaparian sa Archdiocese sa Davao. Pagkahuman sa misa gisunod ang pagbendita sa bag-ong grotto sa Imaculada Conception nga mao ang patroness sa tibook Pilipinas. Kini gitambungan sa mga kaparian, mga pangulo, ug mga parishioners sa maong parokya.

Sa wala pa nagsugod ang Pontifical Mass, gibasa sa usa ka Youth SoCCom nga si Honey Vine ang hamubo apan detalyado nga kasaysayan sa parokya atubangan sa pipila ka mga mitan-aw diha sa Facebook Live sa DXGN 89.9 Spirit FM.

Diha sa pamalandong nga gihatag ni Most Rev. Romulo Valles, iyang gisugdan sa pagpasundayag sa iyang kalipay sa pagkakita niya nga daghan ang mga batan-on nga nanambong sa maong misa. Dugang niya kaya niyang mangandoy sa daghan pang mga katuigan dungag sa kinyentos nga tuig sa Kristyanismo tungod daghay mga batan-on nga iyang nakita sa simbahan. Sumpay niya, “ang ugma nakita na namo karon, maayong reminder sa atong parokya nga nagpista karon.”

Tapos ang misa gipagaambitan ang mga gi-andam sa mga parokyano nga paniudto. Pagkahapon, gipakita usab sa mga kabatan-onan ang ilahang talento isip pagpasalamat sa mga gasa nga gi piyal kanila. Gikapikta nila ang ilang talento sa pagkanta sa “Inter-Zonal Youth Choir Competition” ug talento sa pag drawing sa “Inter-Zonal Poster Making Competition” gilangkoban kini sa 8 ka Sona nga nahisakop sa maong parokya. Kini nga maong aktibidad nagmalampusong gisaulog nga gipangulohan sa Don Bosco-Dacudao Youth Council (DB-D-YC).

Dakong pagpasalamat ang gipadayag ni Rev. Fr. Marcelino Y. Benabaye, SDB—ang Kura Paroko, ngadto sa atong Inahan, Maria Mananabang sa mga Kristyanos, kay Bishop Romulo G. Valles, D.D, sa mga pangulo, kabatan-onan, ug sa mga parishioners. Tungod kanila ang parokya sa Maria Mananabang sa mga Kristyanos mitubo ug misulod sa yugto sa pagkabata; gikan sa pagkamang, kini nagsugod sa pagtindog sa iyang kaugalingon. Ang aktibo ug buhi nga pagtuo sa katawhan, ang grasya sa Dios, ug ang inahanon nga pag-atiman sa Mahal nga Inahan nagtultol niining batan-ong Simbahan sa pagtubo nga matinud-anon ug mabungahon. (Arrafe Sumampong | Parish SoCCom)