GKK Gibalaan sa Santisima Trinidad

Sama sa gikaingon ni Dr. EJ Sabado sa usa sa mga TALAKAYAN Series, kitang mga Pilipino “relational”, nagtuyok ang atong kalibutan sa relasyon. Sama rapod sa tinguha sa simbahan nga kitang tanan duyog sa panaw paingon sa gingharian sa Dios. Ang atong pagtoo nagaghat kanato dili sa pag-inusara apan sa pagkabig, pagdala sa atong mga kaigsuonan ilabi na kadtong wala pa makakaplag sa kamatuoran.

Dili ikalimod ang atong “sense of community”, tungod kay ang atong Ginoo mismo nagpadayag sa Iyang gugma pinaagi sa Amahan, Anak ug Espiritu Santo. Busa ang atong pagkakatilingban konkreto nga makita sulod ug gawas sa simbahan, ug usa na niini ang atong gisaulog karon nga mga 50 katuig sa Gagmayng Kristohanong Katilingban.

Wala makababag ang atong ka-imperpekto sa pagpadayon niining mga pundok sulod sa 50 ka tuig. Tuod man, usahay adunay mga panaglalis ug panagbingkil apan kini normal lamang tungod kay kita buhi, kita nagtubo ug kita kanunay nga naningkamot sa pagusbaw aron kita, sama sa atong Ginoo, mahimong hingpit ug angayan sa iyang gingharian.