GKK: Gasa sa Dios sa Davao nga na nag uban sa Pagpanaw Isip Piniyalan sa Sulod sa 50 ka Tuig

Mga kaigsoonan,

Sa pagsaulog sa ika singkwenta ka tuig sa panag-uban sa panaw isip piniyalan nga simbahan og ang atong misyon sa pagsangyaw og pagsaksi sa maayong balita, kita mapasalamaton sa Dios sa PAGKAGASA sa GKK (GIFTEDNESS of the GKKs) sa Archdiocese sa Davao.

Diha sa guidelines and norms sa GKKs o Yellow book (2014) gisaysay ang pagsugod og paglambo sa mga GKKs sa 42 ka mga parokya sa Archdiocese of Davao. Ang GKK sa Archdiocese of Davao bunga sa diwa sa mapadayunong pagbag-o sa simbahan nga gipasiugda sa Batikano II (1962-1965) og sa panagtapok sa Mindanao and Sulu Pastoral Conference (MSPCs) ilabina ang MSPCs I og II. Usab ang ikaduhang Consejo Plenario sa Pilipinas (PCP II, 1991) naghatag og opsiyal nga pagdawat sa GKK isip duso pastoral (Pastoral thrust) sa tibook Pilipinas. Ang lokal nga simbahan sa Archdiocese of Davao usa sa nag-una pagmugna og pag pagpalambo sa maong direksyon pastoral.

Ang GKKs mao ang konkretong hulagway o nawong sa simbahan isip katilingban. (Communion) nga gipadala isip usa ka misyonaryo aron makab-ot ang maong paglantaw nga Nabag-ong Simbahan (Church renewed). Ang diwa sa partisipasyon, responsibilidad og dialogo gihatagan og kabog-aton. Gani sulod sa 50 ka anyos, ang Archdiocese sa Davao naningkamot sa pagpuyo sa maong panglantaw mao nga ang GKK gihulagway naa bag-ong paagi sa pagkasimbahanon sa English pa, giingon “A new way of being church”.

Basi sa Buhat sa mg Apostoles (Acts 2:42-47; Acts 4: 32-35 og sa sulat ni San Pablo sa 1 Cor 12, Makita nato nga ang unang sumusunod ni Kristo nagpuyo sa diwa sa pagkakatilingban diin ang pagtoo kang Kristo og pagsaulog sa Eyukaristiya mao ang sentro sa ilang kinabuhi.

Ang Dokumenato sa Batikano II, Lumen Gentium, (Light of the World) #4 naghisgot bahin sa Santisima Trinidad, ang relasyon sa gugma sa Amahan, Anak, Espirito Santo. Kini ang pundasyon o basihan sa pagkasimbahanon sa mga GKKs.

Kini ang hinungdan nga ang Dominggo sa Santisima Trinidad (Trinity Sunday) gitawag nga GKK/BEC Sunday. Ang Catechism of Catholic Church (CCC) #780-810 naghisgot sa pagsabot sa simbahan isip Katawhan sa Dios, Lawas ni Kristo og Templo sa Espirito Santo. Mga hulagway sa Simbahan nga basihanan sa pagkasimbahanon (ecclesial) sa mga GKKs.

Dili nato kalimtan nga ang simbahan usa ka misteryo. Busa si Santo Papa Pablo VI miingon nga “Ang simbahan usa ka misteryo, Kini puno sa dili makit-an nga presensya sa Dios. Sa atoa pa, ang kinaiya sa simbahan mao ang pagka abli sa bago og mas lawak nga explorasyon”*.

Kini nindot nga pahinumdom kanato nga sa mapadayunong pagpanaw sa GKK human sa 50 ka tuig unta kanunay kita nga abli sa dagan sa panahon (signs of the times) og mga kausaban “New Fervor, New Expressions og New Methods” nga gihisgotan ni Santo Papa Juan Pablo II.

Sa atong mapadayunong paglawig isip GKK, ato usab hinumdoman nga ang GKKs kabahin sa parokya, sama nga ang mga parokya kabahin sa lokal nga simbahan sa Archdiocese sa Davao. Si Papa Francisco nagpahinumdom kanato sa Evangeli Gaudium (The Joy of the Gospel #28-29) nga ang mga GKKs kabahin gyud sa parokya, (Integral Part of The Parish Community). Sa lain nga pagsabot, ang parokya mao ang kahiusahan sa mga katilingban og laing pundok sa pagtoo (BECs and other faith communities, ehemplo ang ACLAIM sa Davao).

Diha sa Yellow Book, gihulagway ang GKK isip KATILINGBAN, katilingban sa pagtoo nga na sentro sa pulong sa Dios og sa sakramento sa Eukaristiya . Mao nga ang Kasaulogan sa Pulong (KSP) ilabina ang Santos nga misa, importante kaayu nga ginasaulog.

Sa sitwasyon sa Archdiocese sa Davao, ginapaningkamotan nga ang mga GKKs gina siak-siak sa Pundok Banay*. Ang katuyuan mao nga mga sakop sa o myembro sa GKK mas maka-sinati sa pagkasimbahanon: nagaampo, naga-inambitay, nagatinabangay sa usag-usa kansang kinabuhi unta Kristohanon. Kini usa ka paglantaw og proseso sa atoa nagasalig kita sa Espirito Santo sa pag giya og pagdasig aron sa hinay hinay makab-ot ang maong damgo.

Sa kasamtangan, ang GKKs sulod sa parokya mao ang usa sa mga epektibong luna o konteksto diin ibansay ang espiritwalidad sa pagkapiniyalan (Spirituality of Stewardship) Sa maong paagi ang paglantaw sa maong simbahan, mahimong simbahan sa mga kabus mahitabo!

Ang GKKs daw sama sa Asin og Kahayag diin gitawag og gipadala kini aron makahimo og kalamboan sa katilingban (Mathew 5: 13-14). Kung ang pagsabot sa GKK og Stewarship Spirituality usa ka “Way of Life” kini makatabang sa kinabuhi og misyon sa simbahan isip katilingban nga pinadala sa misyon inubanan sa mithi sa Batikano II: Partisipasyon, Pagka kauban sa responsibilidad og Dialogo/Pagpaminaw sa usag usa, ilabina sa nagkadaiyang sekta (Ecumenism og Inter-religious dialogue). Sa laing pagkasulti ang mapadayunong pormasyon kinahanglan sa pagpasabot sa kinaiya, tawag, og misyon sa GKK (Guidelines and Norms of the GKK, pages 27-31).

Sa Katapusan, ang pagsabot sa Simbahan nga synonymous o pareha sa Synodal, diin kini nagpasabot nga kinaiya sa simbahan ang panag-uban sa pagpanaw sa pagsangyaw sa Maayong Balita. Ang mga GKKs, uban sa diwa sa Piniyalan nga Espiritwalidad, mapatuman ang paglantaw sa GKK isip buhing Katilingban sa Pagtoo, Gugma, Kalinaw, Hustisya, Pagkabalaan og Paglaom padulong sa katumanan sa Gingharian sa Dios dinhi sa kalibutan og sa umaabot! (Most Rev. George B. Rimando, D.D. | Auxilliary Bishop of Davao)