FdM kulminasyon sa OLLP malampusong napahigayon

Ang kulminasyon sa Flores de Mayo, sa tema nga “Birhen Maria, kuyog sa panaw paingon kang Kristo”, malampusong napahigayon sa Our Lady of Lourdes Parish sa Bangkal, niadtong Mayo 31, 2022.

Nagsugod ang kalihukan pinaagi sa usa ka prosesyon ug pag rosaryo palibot gawas sa simbahan, dayon ang pagpakaon sa mga katekista og lugaw para sa tanan, nga gi-ambag sa Knights of Columbus sa parokya.

Ang Santos nga Misa gipangunahan ni Fr. Henry Campeon, Kura Paroko sa OLLP, ug sa iyang homiliya, nikanaog ug niduol sya sa mga bata ug gisuta nya kung unsa ang ilang nakat-onan sa pag-apil sa Flores de Mayo.

Human sa Misa, nagpahigayon ang usa ka programa diin adunay mga pangutana sa mga bata mahitungod sa atong Ginoo ug kang Birhen Maria, sa mga misteryo sa rosaryo, mga balaang sakramento, ug uban pa.

Daghang mga premyo ug give-away ang gipanghatag sa mga bata nga inambag sa mga OLLP Marian Groups, nila Don ug Marlyn Lallen, nila Jun ug Jane Jungoy, ug sa mga RJM Sisters sa Jesus and Mary Thevenet School nga nahimutang likod sa simbahan. Ang mga katekista nakadawat usab og sertipiko sa maong programa.

“Ang kura paroko nga si Fr. Henry Campeon ug ang iyang mga kauban nga sila Fr. Romy Coronel ug Fr. Pong Cubero, nagpasalamat sa kooperasyon sa tanan, ilabina ngadto sa mga katekista kinsa naningkamot sa pag-andam sa mga bata sa paghatag sa mga pagtulon-an, inubanan sa mga kaubang pangulo sa matag GKK,” matud pa ni Ana Norbe, ang Head Catechist sa OLLP.

“Dako ang ilang kalipay sa pagpahigayon niining kulminasyon nga gitambungan sa 16 ka GKK, ug ang pinakadaghan nga partisipante gikan sa ICC-Taal GKK,” sumala ni Norbe. “Hinaot nga magpadayon sa pagpanudlo sa mga kabataan aron ang mga kabataan magtubo sa ilang pagtuo kang Kristo ug ang ilang mapadayunong pagdebosyon sa atong mahal nga inahan si Birhen Maria,” panapos ni Norbe.

Ang kalampusan sa kulminasyon sa FdM sa OLLP napahigayon pinaagi sa pagtinabangay sa mga GSL sa matag GKK, mga staff sa parokya, mga kaparian sa parokya, inubanan sa bendisyon sa OLLP Kura Paroko Fr. Henry Campeon, DCD.

Viva Maria! Viva Hesus!

(Rowena Baldoza Villaflor, OLLP SocCom)