Bililhong Gasa

Pila ka misa naba kaha ang atong naapilan, natambongan ug sa mga panahon nga kita mitambong naka-amgo ba kita nga ang atong Ginoo, ang iyang presensya, siya mismo, anaa panahon sa misa pinaagi diha sa iyang lawas ug dugo?

Karong adlawa atong gisaulog ang pinakadakong regalo kanato sa Dios, ang pagkakaplag kaniya pinaagi sa santos nga Eukaristiya. Siya Ginoo, hingpit, perpekto. Kita, mga makasasala, hugaw ug dili angayan apan Siya mipaduol kanato, bisan tuod anaa na siya diha sa sabakan sa iyang Amahan sa gingharian sa langit, wala Siya mibiya kanato tungod kay kanunay Siyang anaa sa Santos nga Misa.

Apan usahay, tungod kita mapuno sa mga kabalaka ug problema, wala pa gani kita kasulod sa simbahan, puno na ang atong huna-huna diha sa mga pagpangayo. Dili na nato masinati ang presensya sa Ginoo sa pagpakahilom kay bisan ang atong huna-huna puno sa mga syagit sa kahingawa.

Karong adlawa, atong himamaton pagbalik ang atong Ginoong Hesus diha sa pagbayaw sa iyang lawas, magpasalamat kita kay siya kanunay nga anaa bisan tuod kita wala manumbaling Kaniya.