“Adlaw Sa Mga Amahan Saulogon Sa Simbahan”

Ang ika-napulo nga pagsaulog sa Pamilya o 10th World Meeting of Families nga pagasaulogon karong Hunyo 22-26, didto sa Roma, sa nasud sa Italya adunay tema nga nagkanayon: “Family love: a vocation and a path to holiness.” Kabahin sa maong selebrasyon sa panagtagbo sa mga pamilya sa tibuok kalibutan didto sa Roma, aduna usab ipahigayon nga pagsaulog sa adlaw sa mga Amahan o “Fathers’ Day” nga giduso sa CBCP Episcopal Commission on Family and Life nga himoon sa naandan na nga pagsaulog niini sa matag tuig. Karong tuiga kini ipahigayon karong Hunyo 19, 2022 sa adlaw nga Dominggo. Kini usa ka kasaulogan nga hiniusa sa “secular” nga paagi ug “simbahanon” nga pagsaulog tungod kay giila man gayod sa simbahan ang dakong papel nga nadawat sa usa ka amahan sa matag pamilya, ilabina diha sa pag amuma, pag protekta ug pag giya sa mga anak ngadto sa dalan sa katarong, kamatuoran ug gugma.

Diri sa Arkidayosis sa Davao adunay pagahimoon nga pagpanalangin (blessings) sa mga amahan panahon sa santos nga Misa sa Hunyo 19, 2022. Ug sa gabii sa programa sa Kahayag sa Pamilya sa alas 7 sa gabii, ang sentro sa panaghisgot mao ang bokasyon ug misyon sa pagka-amahan diha sa Kristohanong pamilya. Manghinaot kita nga ang adlaw sa mga amahan makahatag ug kadasig sa tanang mga amahan ug nga makaamgo sa kaanindot sa ilang bokasyon isip piniyalan ug haligi sa matag Kristohanong pamilya. Hinaot nga sama ni Senior San Jose nga sumbanan sa tanang mga amahan makahatag kanila ug inspirasyon diha sa pagtuman sa plano sa Diyos alang sa pagpalambo sa pagtoo ug panaghiusa sa pamilyang Pilipinhon ug Kristohanon.

Malipayong pagtimbaya kaninyong tanan nga mga amahan! “Happy Fathers’ Day!” (Fr. Orlando Angelia)