Tig-apil Kog Flores Sauna, Karon, Ako Nay Katekista

Niining bulan sa Mayo dako kaayo ang akong nabating kalipay tungod gitugotan na sa Simbahan ang pagpahigayon og Flores de Mayo sa mga Gagmayng Kristohanong Katilingban (GKK). Mahinumdoman nga giundang kini tungod sa lockdown ug pagbawal sa mga bata sa paggawas sa ilang mga panimalay tungod sa Covid-19.

Isip usa ka Batan-ong Katekista o Youth Catechist, ilabihan gayud ang akong pagpasalamat sa Ginoo tungod niining maayong balita. Ang mga Katekista o Pangulo sa Pagpanudlo (PSP) sa St. Mary of the Perpetual Rosary Parish naglunsad og sending forth ug seminar isip pagpangandam sa Flores de Mayo. Nakatambong usab ako sa launching niini sa St. Jude Shrine Parish diin nakauban nako ang lain-laing katekista sa ubang parokya.

Nagpatawag dayon kami og mga bata ug kanunay namo kining ginapahibalo sulod sa Regular Sunday Mass sa among GKK aron sa pagtambong sa Flores de Mayo. Nadesisyonan namo nga himuon lamang kini matag Sabado ug Dominggo tungod kay adunay mga klase ang mga bata matag Lunes hangtod Biyernes. Amo usab ginasiguro nga masunod ang safety protocols sama sa distancing ug pagsul-ob og facemask.

Sa sugod pa lang, nabalaka ako ug nagtuo nga gamay ra ang makatambong tungod sa kahadlok nga dala sa pandemya. Ako kining giampo kang Mama Mary ug daghang salamat kaniya kay iyang gitubag ang akong panalangin. Malipayon usab ako sa panahon nga magtudlo ako sa mga kabataan tungod kay akong makita ang akong kaugalingon diha kanila, nga kaniadtong bata pa ko, dako gyod ang akong gusto nga makakat-on ug bag-ong mga leksyon sa Simbahan.

Karon anaa na ako sa ikatulo ka tuig sa akong pagka PSP ug usab pagka SoCCom sa among kapilya. Sa akong pangedaron, daghan ang misulti nga dili pa ako angay sa pagsulod niini mga ministrya ug nga mas angay kanako ang mahimong PSB. Apan ako nasayod nga ang pagka-katekista ug ang pagka-SoCCom maoy akong tawag sa pagpangalagad. Ako man ang pinakabatang Pangulo sa among katilingban apan ang kagustohan nako nga moserbisyo sa uban padayon gihapong nagdilaab ug kini tungod sa akong makanunayong pag-apil sa Flores de Mayo kaniadto. Ang Flores maoy rason nga ako naaghat sa pagsulod sa mga ministriya sa simbahan.

Tungod niini padayon ako sa pagtudlo ug pag-abag sa mga kabataan aron sama nako ila usab makita ug mailhan ang dakong kalooy ug paghigugma sa gamhanang Diyos ug ang pangama ni Birhen Maria nga atong Inahan.

Ave Maria!

(Allyza Hope Tabigue, GKK SoCCom)