PAGTUO: Ang binhi nga namunga og maanyag nga kultura

Kinyentos ka tuig na ang milabay human nato madawat ang labing dakong grasya nga gihatag sa labaw’ng makagagahom nga mao ang gasa sa pagtuo, ang gasa nga nagtudlo sa paghigugma sa tanan, ang gasa nga naghimo kanatong bag-ong katawhan pinaagi sa atong pagkabinunyagan sa matuod nga simbahan sa Dios, ang gasa nga nahimong sumbanan sa atong kinabuhi,ang gasa nga nahimong ilhanan kon unsa ug kinsa kita isip mga katawhang Pilipinhon, ug pinaagi niining mga gasa naila kita isip mga Pilipino, mga katawhan nga mahigugmaon sa bisan kinsa, matinabangon sa mga nanginahanglan, manggihatagon ngadto sa mga katawhan. Usa kini sa mga birtud nga nahimong kabahin sa dihang nadawat nato ang gasa sa pagtuo ug nahimo kining patik kanato isip mga katawhang Pilipinhong Kristiyano.

Ang atong maanyag nga kultura usab nahimong kabahin sa atong Kistohanong pagtuo pinaagi sa atong nagkadaiyang tradisyon sama na lamang sa pagrosaryo, pagnovena, pag-ampo ngadto sa mga minatay, pagdebosyon ngadto sa mga santos ug ilabi na kang birhen Maria nga kansang nagkalain-laing debosyon sa nagkadaiyang titulo sa Mahal nga Birhen. Tanyag kaayo mahitungod kini sa mga dili maihap nga gasa ug grasya nga natubag pinaagi sa pag-ampo diha sa Mahal nga Birheng Maria ug si papa Francisco usab nag-ingon nga “pueblo amante de Maria” o sa ato pa “nasud nga mahigugmaon ngadto kang Maria” tinuod gayud kini kay si Maria giila nato nga inahan nga kanunay nga nagatabang kanato ug nagaagak paingon ngadto kang Kristo atong Ginoo, busa tungod niini angayan gayod siya nga pasidunggan isip patron usab niining atong nasud.

Sa laing dapit aduna usab kitay mga kultura pinaagi sa mga hudyaka ug pagsayaw isip pasidungog ngadto sa Dios ug sa atong nagkadaiyang patron sama na lamang sa Sinulog, Ati-atihan, Lakbayaw,Turumba sa Birhen, ug uban pa; paagi nato kini sa atong pagpasalamat sa Dios ug sa atong mga patron sa mga pag-ampo nga nadungog ug kining mga debosyon ug kultura tanyag kini dili sa atong nasud lamang kundili sa laing nasud usab ug ginadayo kini sa mga turista aron makita ug moapil sa mga kalihukan sulod ug gawas sa simbahan sa pagpasidungog sa mga nagkadaiyang patron. Adunay uban nga manganhi aron mag-ampo ug mangayo ug panabang sa patron sa nagkadaiyang intensiyon ug kini usab nagtanyag kanato isip mga katawhan nga mapasalamaton, maampuon, ug masaligon sa Diyos.

Hangtud karon sulod sa kiniyentos ka tuig ang simbahan padayun lang gihapon nga nagasimba sa labing balaan nga Dios ug pinaagi sa iyang grasya nganhi kanato kita nagalawig isip mga magtutuong Katolikong Kristiyano ug sa walay katapusang dan-ag sa Espirito Santo kita mapadayunong nagabuhat sa kabubut-on sa labing gamhanan nga Dios nga atoa sa langit ug sa kanunay ang simbahan nagapanaw lang gihapon tungod kini sa walay puas nga pakiglambigit sa mga katawhan sa mga kalihukan sa simbahan ug tungod niini matawag ug maingon gayud nga ang simbahang Pilipinhon usa ka “synodal” nga simbahan kay sulod sa kinyentos ka tuig nagpabilin lang gihapon kining lig-on taliwala sa mga pagsulay nga moabot ug tungod kini sa pagsalig ug pagtuo sa mga Pilipino ug pinaagi sa ilang pag-ambit sa ilang gasa ug grasya ngadto sa simbahan ug sa mga katawhan nga nagapakita gayud sa pagkapiniyalan ug pagkaginasahan pinaagi sa pagmantala sa Ebanghelyo, pagserbisyo sa simbahan,ug pag-apil sa mga organisasyon sa simbahan nga ang tuyo mao ang pagserbisyo sa Dios ug sa iyang katawhan. Tinuod gayud nga kitang mga Pilipinhon mga balaanon ug makita kini pinaagi sa atong pagkaginasahan ug piniyalan sama na lamang ni San Lorenzo Ruiz ug San Pedro Canlungsod nga gigasahan ug gipiyalan alang sa usa ka misyon ug mihalad sa ilang kaugalingon alang sa Dios.

Isip mga binunyagang Kristiyanong Katoliko saulogon nato nga makahulugan ug puno sa kalipay ug grasya ang atong nadawat nga pagtoo diri sa atong nasud pinaagi sa pagpakita sa atong pagkaginasahan ug pagkapiniyalan sa nagkadaiyang aspeto sa pagbuhat niini kay pinaagi sa bunyag nahimo kitang mga bag-ong katawhan sa Dios ug nadawat nato sama na lamang nga ang atong mga katigulangan misalikway sa mga anito, babaylan, diyos/diyosa, ug midawat sa pagtuong naghatag kanato ug kabag-ohan nga nagdala kanato sa matuod nga grasya nga mao ang pagkapiniyalan ug pagkaginasahan isip mga katawhang Pilipinhong puno sa pagtuo ug gugma sa Dios. (Edman Kilat, Jr. | Winner Essay Writing GKK Based Category | 13-18yrs. old)