Pagpangandam para sa Flores de Mayo

Usa ka malampuson nga pagporma alang sa 113 ka mga katekista ang gipahigayon niadtong Abril 25, 2022 (Lunes) sa ala-1 hangtod ala-5 sa hapon isip pagpangandam sa Flores de Mayo nga gipasiugdahan sa kura paroko nga si Rev. Fr. Rolando O. Mandreza. Ang namulong mao si Sr. Ma. Paterna “Terry” Bitas, TDM kinsa mipaambit sa mga tahas sa mga katekista ug sa mga pamaagi sa pagtudlo ilabina panahon sa Flores de Mayo. Sa unang bahin gihatagan ug gibug-aton ni Sr. Terry ang tawag ug kaakuhan isip katekista. Siya miingon, “Ang katekista makatandog hangtud sa kahangturan, pangulo sa panig-ingnan, maampoon, sulogoon, andam motahan sa kaugalingon ug mupuyo sa Ebanghelyo”.

Dugang pa niini, isip usa ka katekista, dapat motubag sa tawag sa pagsaksi sa Ebanghelyo, motudlo sa pagtuo nga haum sa paggiya sa simbahan ug mahimong matinud-anon sa Dios diha sa mahigugmaong pag-alagad ilabi na sa tagsa-tagsa ka Gagmay’ng Kristohanong Katilingban. Gidasig usab niya ang mga katekista sa pagpaningkamot nga mulahutay sa tahas ug kaakuhan bisan paman sa mga pagsulay.

Ang ika-duhang bahin sa pormasyon sa mga katekista naghisgot sa mga pamaagi sa pagtudlo mahitungod sa doktrina, moral ug pagsimba subay sa panudlo sa atong simbahan.Nabahin kini sa upat ka hugna nga mao ang 1.Tawhanong Kasinatian; 2.Kahulugan sa Tawhanong Kasinatian; 3.Pagpadayag sa Kristohanong Mensahe ug 4.Kristohanong Pagpuyo.

Nalipay gayud ang tanang katekista nga gipanguluhan sa PSP Coordinator nga si Mrs. Rosalinda R. Tabancon sa komprehensibo ug mapuslanong panaghisgot nga gihatag sa mamumulong. Busa, dako kaayo ug pasalamat ang tanang katekista sa gipahigayon nga pormasyon tungod kay ang gihisgutan gamit kaayo sa panahon sa Flores de Mayo. (An-Jean V. Naraga-Moneba / SJAP SocCom)