Paglaom diha kang Kristo Hesus

Solemnidad sa Pagkayab ni Hesus sa Langit (May 29, 2022)
Acts 1:1-11 / Ps 47:2-3, 6-7, 8-9 / Eph 1:17-23 OR Hebrews 9:24-28; 10:19-23 / Lk 24:46-53

Ang pagkayab ni Hesus ngadto sa langit usa ka timailhan nga ang iyang gingharian dili gayod niining kalibutana. Kini usa ka pagpadayag nga Siya gikan sa Amahan ug karon mobalik usab ngadto sa Amahan. Kini usa ka timailhan nga Siya mobiya na sa iyang mga tinun-an sa pisikal nga presensya og ang Iyang presensya lahi na nga matang o libel ug aron sa paghatag kanila sa Espiritu Santo aron maglig-on kanila sa tanang higayon sa ilang kinabuhi. Ang Ginoo nga mihatag sa tanan bisan didto sa pag-ula sa iyang kinabuhi didto sa krus, aron mapadayag ang iyang dakong gugma kanato.

Ang iyang pagbalik ngadto sa Amahan, dili aron nga biyaan sa hingpit ang iyang mga tinun-an apan hatagan sila ug bag-ong misyon nga mao ang pagsangyaw sa maayong balita nga si Hesukristo mao ang Anak sa Dios nga bugtong ug nagluwas kanatong tanan gikan sa kaulipnan sa sala ug paghatag sa kinabuhi nga walay katapusan. Ang mga tinun-an malipayon nga namalik ngadto sa Jerusalem ug kini sukwahi sa atong kasinatian kon kita biyaan sa atong gihigugma pag-ayo, lagmit kita masubo gayod pag-ayo apan ang mga tinun-an nagmaya sa kalipay tungod kay ang Ginoong Hesus nagpasalig kanila nga Siya makig-uban kanila hangtod sa katapusan sa kalibutan. Kining maong saad sa atong Ginoo kasaligan ug matuod gayod. Kita nga iyang mga tinun-an usab maningkamot sa pagtuo ug mosalig niining maong saad, ang saad nga walay kapakyasan sa atong Ginoo. Atong gamiton kining maong saad sa atong Ginoo nga maoy iwag sa atong mangitngit nga dalan sa kinabuhi ug kuptan nato kini ingon nga usa ka dakong bahandi nga atong gitinguha kanunay.

Diha sa hagit sa atong tagsa-tagsa ka kinabuhi kita gipahinumdoman nga ang atong Ginoo nag-uban gayod sa kanunay sa atong panaw. Dili kita mawad-an sa paglaom bisan pa man sa mga kalisdanan nga atong mahiagoman, ang Ginoo nagpasalig nga Siya anaa kanunay sa atong kiliran. Ang ato lamang nga hinumdoman nga makamao kitang mosangpit sa panabang sa atong Dios ug manluluwas nga nabanhaw ug karon mikayab ngadto sa langit ug nagalingkod sa tuo sa Amahan ug naghatag sa Espiritu Santo aron molig-on kanato sa tanang higayon ug modasig kanato aron sa pagsangyaw sa maayong balita nganto sa tibuok kalibutan. (Bro. Soren Abellanosa)