Nagdilaab nga gugma sa Dios sa tanang katawhan

Solemnidad sa Pentekostes (June 5, 2022)
Acts 2:1-11 / Ps 104:1, 24, 29-30, 31, 34 / 1 Cor 12:3B-7, 12-13 / Jn 20:19-23 or Jn 14:15-16, 23b-26

Ang pagkunsad sa Espirito Santo ngadto sa mga tinun-an usa ka timailhan nga ang atong Ginoong Hesukristo nagtuman gayod sa Iyang saad nga Siya kinahanglan moadto sa Amahan aron mopadala sa manlalaban nga mao ang balaang Espirito nga maoy maglig-on kanila sa umaabot nga panahon. Ang paghatag sa Espirito ngadto sa mga tinun-an naghulagway nga Siya wala gayod mobiya kanila sa hingpit, apan mihatag Siya kanila sa Espirito sa kalig-on, panagdait ug kahiusahan. Siya nga nagpadala kanila ngadto sa tibuok kalibutan maingon nga ang atong Ginoo gipadala usab sa Amahan.

Sa dihang ang atong Ginoong Hesus mipakita kanila, human sa makapasubo nga panghitabo nga mao ang paglansang sa krus. Apan niining higayona ang atong Ginoo naghatag kanila sa iyang mahimayaong presensya nga diin sila nalipay pag-ayo tungod kay Siya ilang nakita ug gihuypan Niya sila sa Espirito Santo. Ang kamahinungdanon sa paghatag kanila sa balaang Espirito usa ka pagpadayag nga ang naghingapin nga gugma sa Dios sa tanang katawhan mapadayag ug mapaambit ngadto sa uban.

Ang kamatuoran sa paghatag sa Espirito Santo nga nagdan-ag sa matag-usa ka kasingkasing aron makasabot pag-ayo sa realidad sa dakong gugma sa Dios nganha sa tibuok katawhan. Ang Espirito sa kamatuoran nga diin magdala sa matag-usa sa pag-ila sa Dios nga maoy tuboran sa kalinaw. Ang kalinaw nga nagsukad diha sa kinahiladman sa tawo nga maoy maghatag sa tinuod nga kalinaw. Ang kalinaw nga dili ikahatag sa kalibutan ug bugtong ang Dios lang ang makahatag niini.

Kon atong balikan ug mahinumdoman nga diin si San Juan Magbubunyag nag-ingon ngadto sa katawahan nga siya nagbunyag sa tubig apan adunay mas labing gamhanan nga moanhi sunod kaniya ug Siya magbunyag sa Espirito ug kalayo, karon ang atong Ginoong Hesukristo naghatag sa Espirito Santo ngadto sa mga tinun-an human sa naghingapin nga pag-ampo ug kini mao ang giingon ni San Juan. Sa kinatibuk-ang misyon sa atong Ginoong Hesus, Siya buot gayod nga mohatag sa Espirito sa Dios sa tanang katawhan nga diin kini maghatag sa kabag-ohan sa kahimayaan sa Dios pinaagi sa pagpasakit, pagpakamatay, ug pagkabanhaw sa atong Ginoong Hesukristo. Ang Espirito sa Dios nga gibubo sa hinay-hinay diha sa atong tagsa-tagsa ka kinabuhi sa hilabihan gayod aron kita maputli ug sa pagpalong sa kalayo sa kadaotan ug pagpasiga sa Diosnong kalayo sa gugma sa Dios diha sa matag-usa kanato.