Kulang Akong Oras

Dear Ate Emz,

Ang kaugmaon naka base sa kung giunsa nato kini pagdala. Sama sab sa atong kaluwasan kung ang pagpamuyo nahisubay ba sa kabubut-on sa Dios Amahan.

Taud-taud na sab ko sa akong trabaho. Okay man ang akong kita nga maka sustinir sa akong mga panginahanglanon ug maka paambit pa sa akong mga ginikanan ug sa akong usa ka igsoon nga sa kasamtangan anaa na sa grade 8. Dako akong pasalamat sa GINOO sa akong naangkon nga mga gasa ug nahimong gasa usab sa uban.

Ang ako lang kay kabalo ako nga dili kini igo nga makapahimuot sa Dios kay sa akong pagtrabaho usahay wala na akoy panahon sa pagsimba. Tamaron ako kay sa adlaw nga pagsimba mao usab ang akong panglaba, limpyo ug maka diskanso. Hinoon dunay mga higayon nga maka bisita sa Simbahan pero lagi inconsistent kini.

Mao kini ang akong gustong bag-ohon sa akong kinaiya ug batasan towards sa personal nga relasyon sa atong GINOO nga mao ang provider sa tanan.

Mapasalamaton,
Yuri

* * * * * *

Dear Yuri,

Ang mga panalangin gikan sa Ginoo sa kanunay Iyang ginabubo sa atong kinabuhi, busa, angayan gyud nga kita mahimong mapasalamaton Kaniya. Bulahan kaayo ka nga naa kay maayong trabaho nga makasustinir sa imong mga panginahanglan ug mapaambit pa nimo kini dinha sa imong pamilya. Nagatuo ako nga ang kahamugaway sa kinabuhi nga inyong gitagamtam karon mao ang mga bunga sa tanan nimong kahago ug sakripisyo. Dalaygon ang imong kahimtang nga tungod niini nahimo ka usab nga panalangin sa uban.

Bisan pa taliwala niining tanang mga kakugi ug mga sakripisyo, morag napakyas ka sa pagsakripisyo sa imong oras alang sa atong Ginoo nga maoy gigikanan sa tanan nimong mga panalangin sa kinabuhi. Matod pa nimo, wala ka nay panahon sa pagsimba sa adlaw nga Domingo tungod kay mao kini ang adlaw nga manglaba ka, magbuhat sa uban pang mga buluhaton, ug makapahuway.

Mahimo nga ikaw adunay materyal nga kauswagan apan labaw nga importante mao ang imong espiritohanong kinabuhi. Salamat sa Ginoo nga ikaw nakahimo sa pagpamalandong sa kalidad sa imong relasyon uban Kaniya. Usa kini ka gasa nga Iyaha na usab gihatag kanimo aron makaamgo ka sa imong kalapasan niining bahin sa imong kinabuhi. Mao kini nga morag di ka malinawon tungod kay dili ka makahatag og panahon alang Kaniya, ilabi na sa mga Dominggo diin kinahanglan nga tumanon ang maong obligasyon nga makauban ang Ginoong Hesuskristo sa Sakramento sa Santos nga Eukasristiya.

Atong hinumduman nga ang Sakramento sa Eukaristiya (Holy Mass) mao ang sentro sa atong pagtuo, ang tinubdan ug kinatumyan sa atong Kristohanong kinabuhi (CCC 1324 p.370), ang pinakataas nga matang sa pagsimba ug pag-ampo sa Ginoo. Kini mao ang handumanan sa Paskwa ni Kristo, sa ato pa, ang buhat sa kaluwasan nga nahimo pinaagi sa kinabuhi, kamatayon ug pagkabanhaw ni Kristo, usa ka buhat nga gihimo pinaagi sa liturhikanhong aksyon. (CCC1409 p.396). Isip usa ka sakripisyo, ang Eukaristiya gihalad usab agig pag-uli sa mga sala sa mga buhi ug sa mga minatay, ug aron makabaton sa espiritohanon o temporal nga mga kaayohan gikan sa Ginoo.(CCC1414 p,397) Ug dugang pa niini, dinha sa Santos nga Misa, makakat-on ka sa mensahe sa Ginoo gikan sa mga pagbasa ug sa homiliya sa pari. Ug mao kini ang mogiya kanimo sa imong pagbag-o ug pang adlaw-adlaw nga kinabuhi.

Sa laing bahin, kung imong pamalandongan, gigasahan ka sa Ginoo og 24 oras sa usa ka adlaw, 7 ka adlaw sa usa ka semana, dili pa ba nimo mahimo ang paggahin og bisan usa ka oras aron makauban Siya sa adlaw nga Dominggo pinaagi sa pagsimba?

Sa pagkatinuod lang, ang pagka walay panahon dili isyu dinhi, apan ang tanan nga imong kinahanglan mao lang ang maayong pagdumala sa imong oras. Paghimo og eskedyul sa mga kalihokan nga imong giplanong buhaton sulod sa 24 oras, labi na sa adlaw nga Dominggo. Nagatoo ako nga imong mamatikdan nga aduna gyud diay kay daghang oras. Unsa man ang imong prayoridad? Sa imong listahan, asa dapit nakabutang ang mga buluhaton alang sa Ginoo? Kalagmitan nga ibutang ang Ginoo ingon nga usa ka reserbang ligid aron pun-on ang bakante nga oras, ug usahay papaon ug ilisan pa kini sa laing bulohaton. Naay mga higayon nga makadungog kita sa uban nga mosulti, “ay, dili lang sa ko mosimba kay naa pa koy laing buhaton”. Sa ato pa, imbes nga ibutang ang Ginoo sa pinakauna sa mga prayoridad, murag Siya hinuon ang “dispensable” sa listahan.

Sa imong kabahin, Yuri, nagpadayag ka nga mao kini ang gusto nimong bag-ohon sa imong kinaiya, ang imong relasyon sa Ginoo. Busa, ayaw na paglangan, KARON NA ang panahon sa paglihok. Kinahanglan nimo ang usa ka lig-on nga determinasyon ug kusog sa pagdaog sa pakigbisog batok sa imong mga kahuyang. Nanginahanglan og dakong pagpaningkamot aron mahimo kang makanunayon sa imong mga lakang sa pagbag-o. Sa imong kaugalingon, lisod kini buhaton, apan kung kauban ang Ginoo, walay imposible. Hinumdumi nga ang Ginoo kanunay nga nag-atiman kanimo ug walay puas ang Iyang gugma kanimo!

Samtang imong gibalaan ang adlaw sa Ginoo, ug sama sa ginasulti sa pari pagkahuman sa Santos nga Misa… “lakaw sa kalinaw ug himayaa ang Ginoo sa imong kinabuhi”. Busa, tungod niini, ang imong pag-ampo gihubad ngadto sa buhat, samtang gihimo nimo ang ubang mga buluhaton sa tibuok adlaw. Pinaagi niini nagpadayon ka sa imong pagdayeg sa Ginoo, ug nagatoo ako nga labaw makapahimuot kini Kaniya. Busa, himoa nga Siya mao ang sentro sa imong kinabuhi.

Hinaot nga kining panahon sa Pasko sa Pagkabanhaw magdala kanimo nga mas duol sa atong Ginoong Hesukristo.

God bless you more.
Ate Emz