Kristo Hesus, Ang Maaayong Magbalantay

Ika-upat nga Domingo sa Pagkabanhaw (May 8, 2022)
Acts 13:14, 43-52 / Ps 100:1-2, 3, 5 / Rev 7:9, 14b-17 / Jn 10:27-30

Si Hesus mao ang maayong magbalantay. Si Hesus nga mihukas sa iyang pagka-Dios ug miambit sa atong pagkatawhanon ug nagmasinugtanon bisan sa kamatayon didto sa krus. Ang krus mao ang lintunganay ug ang matuod nga sukdanan sa pagkamaayong magbalantay. Aduna gayoy dakong kalambigitan ang pagserbisyo alang sa kahimayaan ug ang krus. Ang gipakita kanato sa atong Ginoo usa ka matuod nga agianan paingon ngadto sa kahimayaan. Ang krus mao ang pultahan og agianan paingon ngadto sa Amahan, ang atong Magbubuhat.

Diha sa atong Ebanghelyo si Hesus miingon “Ang akong mga karnero maminaw sa akong tingog, ug nakaila ako kanila ug mosunod sila kanako” kini usa ka paghulagway nga si Hesus ang maayong magbalantay nga maghatag gayod og giya ngadto sa iyang mga karnero. Usa ka hagit kanatong iyang mga sumusunod nga naglambigit sa dakong responsibilidad sa matag-usa. Usa ka pagtahan sa kaugalingon nga dili ang kaugalingong kahimayaan ang tagbawon kon dili ang sa uban. Ang paghatag sa kaugalingon nga mapaduol ngadto sa balaang kasingkasing ni Hesus ug dili sa atong tagsa-tagsa ka mga gagmay’ng kasingkasing; mapaduol ngadto sa kasingkasing ni Hesus nga puno sa gugma ug andam nga mohatag sa tanan.

Apan sa laing bahin, mahimo lamang nato kining tanan kon aduna kitay dakong paghigugma ngadto kang Hesus kinsa mao ang maayong magbalantay. Atong himoon nga mahisama ang atong tagsa-tagsa ka mga kasingkasing sama sa kasingkasing ni Hesus nga andam motahan sa tanan. Ang pagkamaayong magbalantay nagsukad diha gayod sa dakong relasyon diha sa Dios nga diin iya kitang gihigugma sa hingpit. Kini mabatian sa tanan nga naminaw kanato nga kita wala lamang nagsulti sa atong kaugalingon apan sa atong gibarogan nga mao si Kristo Hesus, ang maayong magbalantay.

Sa katapusan, ang pagkamaayong magbalantay usa ka tawag sa matag-usa kanato. Kita gipahinumdoman sa gipiyal kanato sa Dios nga mahimong responsable ngadto sa atong mga igsuon. Atong paminawon kanunay ang tingog sa maayong magbalantay aron dili kita malingla sa tingog sa tigpaka-aron-ingnon. Ato pa gayod nga palawman ang pag-ila sa tingog sa maayong magbalantay aron kon ugaling adunay gustong mosundog niini, maila nato ug magiyahan pag-ayo ang mga karnero ngadto Kaniya. Ato gayod nga isalig ngadto Kaniya ang tanan kay Siya miingon man “Ang akong Amahan nga naghatag niining tanan Kanako, labaw sa tanan; ug walay makasakmit kanila sa kamot sa Amahan.” (Bro. Soren Abellanosa)