Kapistahan sa San Isidro Labrador sa Catalunan Grande mabulokon

Ang ika-23 nga kapistahan sa parokya ni San Isidro Labrador sa Catalunan Grande malipayong saulugon uban sa temang “PAGKAMAAYONG PINIYALAN SA GINOO, SAMA KANG SAN ISIDRO NGA BALAAN, ATONG PUY-AN”.

Gisugdan ang pagpangandam sa maong kapistahan pinaagi sa usa ka Panaw-duaw kon asa bisitahon sa Imahen ni San Isidro ang 38 ka mga GKK nga sakop sa parokya. Kini pagahimoon matag gabii ug nagsugod niadtong Marso 15, 2022 ug natapos niadtong Mayo 4, 2022. Naghimo og espesyal nga team ang parokya aron sa pagdumala niining panaw-duaw nga gipangulohan gayud ni kura paroko Rev. Fr. Max Bahinting. Uban kaniya ang mga formators ug uban nga mga coordinators sa nagkadaiyang mga ministriya sa parokya.

Diha sa panaw-duaw sa matag GKK gipahigayon ang: una, Katekismo mahitungod sa kinabuhi ni San Isidro Labrador; ikaduha, mao ang pagbalik sa kasaysayan sa atong katolikong pagtoo sa pagsaulog sa ika kinyentos ka tuig sa Kristyanismo dinhi sa Pilipinas kung diin mas mapasabot ang atong pagka GINASAHAN ARON ATONG IKAPAAMBIT SA UBAN O GIFTED TO GIVE. Ang ikatulong bahin mao ang Pagpalawom o dugang lang nga pagpasabot mahitungod sa atong pagka piniyalan pinaagi sa atong HALAD PASALAMAT. Gani dili na kini bag-o sa mga parokyano kay kadtong miaging tuig pa gisugdan na kining ginatawag nga Parish Support Fund o Pledges nga karon gitawag na og HALAD PASALAMAT. Ang ika-upat nga bahin sa maong kalihokan mao ang OPEN FORUM kon dialogue with Fr. Max. Gi-awhag ang katilingban sa pagpasibaw sa ilang mga kalibog, pangutana ug mga kalisdanan aron mahatagan og tubag kay mismong ang kura paroko gayud ang mitubag niiining tanan. Ang ikalima ug katapusang bahin sa maong kalihokan mao ang Pagpasalamat sa Ginoo pinaagi sa Santos nga Misa diha sa GKK.

Malipayon ug mainiton kaayo ang pagdawat niining kalihokan diha sa matag katilingban nga gibisitahan. Kining panaw-duaw nga gipahigayon usa kini sa konkretong tubag diha sa mga mulo nga napaminawan atol sa Synod on Synodality Consultation nga gipahigayon sa parokya nga ang matag katilingban adunay kauhaw sa mga pormasyon ug gimingaw na sila sa Santos nga Misa nga ipahigayon sa GKK, maong diha sa pagpamalandong gibuhi pagbalik kining Panaw-duaw nga kalihokan sa parokya.

Diha usab sa mga kalihokan sa kapistahan ni San Isidro nagpahigayon ang parokya og panawagan sa mga kabataan ug sa katilingban sa buot mudawat sa Sakramento sa Kompirma. Malipayon kaayo ang parokya sa baga nga katawhan nga buot modawat sa maong sakramento gani niabot sa kapin 500 ka indibidwal maong gihimo nga adunay duha ka hut-ong alang niini. Ang una gipahigayon niadtong Mayo 7, 2022 ug ang ika-duha niadtong Mayo 14, 2022.

Ug sa kapistahan karon, ang mga schedule sa Santos nga Misa mao ang mosunod: 6AM, 8AM (Pontifical Mass), 10AM, 3PM ug 5PM. Niining atong mga kalihokan sa simbahan: 500 years of Christianity in the Philippines, Stewardship Program ug Synod on Synodality, angayan lamang nga atong sumbanan ug kapanalaminan ang kinabuhi ni San Isidro pinaagi sa pagsuta sa iyang mga Hiyas isip maayong piniyalan sa Dios. Malipayong Pagsaulog sa ika-23 nga kapistahan San Isidro Labrador Parish – Catalunan Grande!

Viva San Isidro Labrador!

(Jerick “Nash” Nacion | Worship Ministry Coor.)