Ika-56 nga selebrasyon sa World Communications Day

Isip pagsaulog sa ika-56 nga tuig sa World Communications Day karon Mayo 29, 2022, gipahigayon ang usa ka selebrayon ug panagtapok sa pipila ka mga myembro sa Archdiocesan Social Communications Committee niadtong adlawng Sabado Mayo 28 sa Marian Hall, San Pablo Parish uban sa tema “Pagpaminaw Uban sa Dalunggan sa Kasingkasing”.

Ang World Communications Day gisugdan ni Pope Paul VI niadtong 1967, isip usa ka tinuig nga selebrasyon nga nag-awhag sa pagpamalandong sa mga higayon ug mga hagit sa modernong pamaagi sa komunikasyon.

Kahinam ang gibati sa atong mga volunteers tungod ang dinapit nga mamumulong mao si Bishop Marcelino Antonio Maralit nga mao ang kasamtangang Chairman sa Episcopal Commission on Social Communications. Gawas niining iyang pagpaambit duna sab kulokabildo o open forum nga gikalipay sa mga volunteers tungod sila naka pasibaw sa ilang mga kalibog ug mga opinyon.Gipangandaman ang maong panagtigom sa Davao Verbum Dei Media Foundation Incorporated Staff ug manambong usab sa mga Parish Social Communications Committee (SoCCom) Volunteers uban sa Parish Social Media Teams.

Nagtuyok ang tema karong tuiga diha sa pagpaminaw uban ang dalunggan sa kasing-kasing. Sa sulat ni Papa Francisco, iyang gipamulong nga ang maayong komunikasyon naggikan sa pagpaminaw. Ang pagpaminaw susama sa mapaubsanong estilo sa Diyos. Kini mao ang aksyon nga nagtugot sa Dios sa pagpadayag sa iyang kaugalingon nga pinaagi sa iyang pagpamulong nahimugso nga susama Kaniya ang Iyang binuhat nga lalaki ug babaye ug pinaagi sa pagpaminaw giila Niya sila nga Iyang mga kauban sa pagpakigpulong.

(“Listening corresponds to the humble style of God. It is the action that allows God to reveal himself as the One who, by speaking, creates man and woman in his image, and by listening recognizes them as his partners in dialogue.”)

(Sheila Marie C. Pieza | AdDU Intern)