Hamubong Katesismo: FLORES DE MAYO

Kadaghanan nato nakadungog na niining pulong nga FLORES DE MAYO. Mao kini ang kinatsila nga pulong, nga sa ato pa, “mga bulak sa Mayo.” Sumala sa atong maobserbahan nga ang Mayo mao ang bulan nga tingpamulak o tingpamuklad sa mga bulak. Busa mao kini ang maayong higayon nga kita makapakita o makapadayag sa atong pag-ila, pagdayeg ug paghigugma kang Birhen Maria sa makita nga paagi nga mao ang paghalad sa mga bulak. Sa atong kasinatian, kun adunay mga tinamud nga mga tawo nga moabot mobisita sa atong lungsod o dapit, ato dayon silang sab-ongan ug mga bulak, nan way katarungan nga kini dili nato mabuhat ngadto kang Birhen Maria. Kun buot hunahunaon, mas labaw pa gani unta ang atong buhaton ngadto kaniya.

Maanindot ug makahuluganon nga tradisyon ang pagdala ug mga bulak ngadto sa larawan o debulto sa atong bulahang Inahan panahon sa bulan sa Mayo alang sa iyang espesyal nga debosyon. Usa ka tradisyon nga adunay halawom nga kahulogan. Ang anak nga si Hesus mahimuot kun ang pagpasidungog gihimo alang ug tungod sa iyang Inahan. Malipay si Hesus kun kita usab magdayeg sa iyang Inahan nga ato usab nga Inahan.

Ang mga bulak mga gasa, maanindot nga gibuhat sa Dios, nagtimaan sa kamanggihatagon sa atong Amahan. isip mga anak ni Birhen Maria, atong ipakita ang atong gugma inubanan sa dakung pagpaubos. Si Birhen Maria, wala magsapayan sa bili o kantidad sa mga bulak, kun dili ang atong kadasig ug kakugi sa paghalad tungod sa atong gugma kaniya.

Diha sa mga bulak atong gihalad ang atong kaugalingon ug misalig kita nga si Birhen Maria magpanalipod ug nagapahilayo kanato sa tanang mga katalagman ilabina niining pandemya nga atong giatubang karon. Gikinahanglan ang kinasingkasing ug maayong intensiyon: ang limpyong hunahuna diha sa atong paghalad, maoy dakong kalipay ni Birhen Maria ang Inahan sa atong Dios.

Nagpahinumdum usab kini kanato sa mga birtud ug hiyas nga naangkon kun nahuptan ni Birhen Maria mga hiyas nga mao usab ang atong gitinguha ug gipaningkamotan nga mapuy-an sa atong kinabuhi.

Ang kinabuhi ni Maria usa ka matuod nga “garland” sa mga birtud/hiyas nga nag-iwag sa kasingkasing sa iyang mga anak ug nga maoy migawas isip humot nga halad ngadto sa Balaang Trinidad.

Kita ang Pueblo Amante de Maria, “a people in love with Mary.”