Gisaulog ang ika-unom nga kapistahan sa Sta. Cruz, Talicud Island

Gipanguluhan ni Arsobispo Romulo Valles ang misa alang sa ika-unom nga kapistahan sa parokya sa Sta. Cruz, Talicud, Island Garden City of Samal, kaniadtong petsa tres sa Mayo adlawng Martes. Kauban misaulog sila Rev. Fr. Oliver Maningo, SDV, Rev. Fr. George Garcia, SDV, ug Rev. Fr. Ricky Peñalosa.

Human sa duha ka tuig nga wala siya makasaulog sa misa tungod sa hagit sa Covid-19, gidayeg sa arsobispo ang dakong kabag-ohan sa parokya. Alang niya mas nidako ug mas nindot ang imprastraktura sa parokya inubanan sa madasigon ug mas nagkainit nga pagtuo sa mga parokyano.

Iya sad gihinumdom nga kaniadto walay mitutol sa pagmugna og usa ka parokya sa Talicud kay nakita nila nga kining katilingabana abtik ug angayan na ma parokya. Gilakip sad sa pagpamalandong ang ika-500 nga tuig sa Kristyanismo sa Pilipinas nga nagsugod sa Cebu. Sa dili malayo, gi lubong kuno ni Magellan ang usa ka krus sa Limasawa. Balikon nga sa wala pa matukod ang parokya sa Sta. Cruz lakip pa kini sa Parokya sa Sto. Niňo, Kaputian.

Matud pa sa arsobispo ang krus ang timaan nga mapalanggaon ang Ginoo. Kini usa ka simbolo sa dili matukib nga gugma sa Ginoo nga mao ang dalan, kamatuoran, ug kinabuhing way utlanan.

Hamtong man o batan-on nipataas sa ilahang mga bit-bit nga krus alang sa pagbindita, inubanan sa pagpasalamat ug ilang mga pangaliya ngadto sa Balaang Krus. Ang mga deboto mituo nga ang debosyon sa Sta. Cruz ang magdala kanila paduol ngadto dalan sa Ginoo.

Nagpaambit sad og pakigtimbaya sa maong misa sa kapistahan ang mga netizens sa Facebook live sa DXGN Spirit FM, sama sa mga parokyano nga nagtrabaho sa ubang nasud o mga parokyano nga wala makatambong sa parokya. (Sheila Marie C. Pieza, AdDU Intern)