Flores de Mayo, gisugdan na

Gipaugda ang Flores de Mayo sa Arkidyosis sa Dabaw pinaagi sa santos nga misa nga gipangulohan sa kasamtangang direktor sa John XXIII Catechetical Council nga si Reberendo Padre Roy Mejias niadtong Mayo 2, adlawng Lunes, 2022.

Sa hamubo nga pagpalanog niining launching, ubay-ubay gihapon sa mga katekista ang mga nakatambong sa misa uban sa hapit ochenta ka mga kabataan gikan sa nagkalain-laing mga GKK nga sakop sa St. Jude Thaddeus Parish. Hinungdan nga ang pamalandong ni Fr. Roy buhi nga mga hulagway nga iyang gipakita diha sa mga TV screens sa parokya.

Mipasiuna siya sa pagdala ug payong diha sa ambo nga misimbolo sa huna-huna ug kasing-kasing sa tawo nga maablihon. Sulti niya “a mind is like an umbrella, it does not work if it is not open”. Simpleng pahinumdom ngadto sa mga bata nga kinahanglang silang magmaablihon sa mga katesismo ug pagtulon-an nga ilang makutlo sa matag adlaw sa pagpahigayon sa Flores de Mayo.

Daghan ang mga maanindot nga panultihon nga kakutloan gayod sa mga pagtulon-ang gipaambit ni Fr. Roy ug ulahi niini ang usa ka talan-awon mahitungod sa usa ka estudyante nga walay balon tungod sa kawad-on, sa panahon sa recess migawas siya ug niinom nalag tubig tungod gutom man. Sa iyang pagbalik diha sa classroom, natingala siya nga mibug-at ang iyang dalang balonan ug sa iyang pag-abli, napuno na kini sa mga klase-klaseng pagkaon nga sa iyang pamalandong hinatag sa iyang mga classmates.

Nakatandog gayod kini sa pipila ka mga kabataan nga miapil sa misa ug sa katapusan gitagaag duso ni Fr. Roy ang pagpaambit sa mga gasang nadawat, pagtulon-an ug pagtoo nga makaplagan unya niining mga bataa panahon sa ilang Flores. Matud pa niya, dili gayod makuhaan ang kahayag sa usa ka kandila kung musindi ang uban gikan niini. Sama ra sa kalipay, nga mas mu-alegre pa kung ipaambit sa uban.