Ang gasa sa pagtuo maoy tinuod nga kahayag sa kinabuhi

Upat ka tuig na ang pagdumala ni Rev. Fr. Leonardo Dublan, Jr. isip Kura Paroko sa St. Joseph Parish (Patron Saint of Workers) Sasa, Davao City. Dako kaayo ang kausaban sa kinabuhi sa mga parokyano, tungod kay bisan tuod anaa ang kasinatian sa pandemic nagpadayon gihapon ang mga kalihokan pinaagi sa virtual set-up o Face to Face dala ang pagmatngon ug ang pagsunod sa protocol. Ang kainit ug kaikag sa mga lederes sa GKK sa pagpangalagad nagpadayon ug malungtaron.

Bag-o lang gisaulog ang ika-58 nga Parochial Fiesta niadtong Mayo 1, 2022 ug gipaningkamutan ang pagkab-ot sa Tema nga,” Mapadayunong pagpanaw sa mga piniyalan diha sa diwa sa Sinodo uban ni San Jose nga mamumuo.” Pinaagi sa mga kalihokan nga gipahigayon , agi pahinungod sa mahal nga Patron.

Una, gisugdan ang Batch 9 sa 33 Days of Prayer Preparation alang sa Pagkonsagrar kay San Jose nga gihimo sa adlaw sa kapistahan nga atol sa pontifical Mass nga gipangulohan ni Archbishop Romulo Valles. Kini usa ka ang-ang nga ang gikonsagrar motahan sa iyang kaugalingon sa pagdeboto kang San Jose, siya magmakanunayon nga mag-ampo og maningkamot nga masunod ang hiyas ug bertudes sa patron. Dugang pa, nga sa matag tulo ka adlaw nga milabay ilang gihimo ang Summary night nga gipahitabo online isip mapadayonon nga pormasyon.

Ug gitagaan og kahigayonan sa Parokya nga ang adlawng Hwebes mao ang Misa pahinungod kang San Jose ug paghuman sa Santos nga Misa ang tanan makadawat og panalangin sa dili pa mopauli.

Samtang gipahigayon ang siyam ka adlaw sa nobena, kini gisugdan sa usa ka pilgrimage uban ni San Jose, nga gipasiugdahan sa nagkalain-laing mga Zona. Ang matag adlaw adunay pagpamalandong sa mga hiyas o Titulo ni San Jose, Kini nakatabang aron mas mapalawom ang pagkaila kang San Jose og madasig sa pagsunod niini. Diha sa Santos nga Misa pagabendisyonan usab ang mga stampa ni San Jose aron ang Family Enthronement to St. Joseph ipahigayon ngadto sa mga pamilya sa katilingban.

Kini ang rason nga daghan kaayo ang motambong ilabina sa Novena Mass ug mosuporta sa mga kalihukan. Daku kaayong tabang ang pagpasabot sa Spirituality of Stewardship, nga maoy nakadasig sa mga GSL’S ug mga myembro, naka-abli sa panghunahuna ug pagsabot sa katungdanan isip mga anak sa Dios, hinay-hinay nga gipuy-an ang kinaiya nga pagkamanggihatagon sa iyang mga grasya ug madawaton sa kaugalingon isip piniyalan sa Iyang mga binuhat.

Ug dugang pang mga pagpadayag sa kinaiya nga pagkapiniyalan , panahon sa siyam ka mga adlaw sa nobena gipahigayon usab ang “Hot Meals on Wheels” nga gipasiugdahan sa Parish Social Action/Pangulo sa Alagad ug ang mga Devotional group maoy nagsponsor sa matag adlaw nga pag-apod-apod og mga food pack ngadto dapit sa Southern Philippines Medical Center (SPMC). Gibati usab nga kini sila ang angay nga atimanon kay sila labing nanginahanglan ug gigutom.

Makahuluganon kaayo ang gihimo nga prosesyon alang ni San Jose, ug makatandog sa balatian, kalipay ngadto sa nangapil tungod kay gitugot na nga maka-apil ang katawhan ug kauban sa 40 ka mga GKK nagdala sa ilang mga Patron nga gisakay sa Trysikad o ang uban gipas-an, gipangandaman gayud kini sa mga pangulo.

Sa adlaw sa kapistahan, nagkatapok ang mga GKK, nagpahimutang sa ilang St Joseph’s Table alang sa Fellowship lunch nga gibendisyonan ni Fr. Bong, samtang ang mga batan-on naghimo og kalingawan alang sa tanan. Nag-andam usab og lain nga St. Joseph’s Table alang ngadto sa nagsimba sa alas dose sa udto, gipang-apod-apod ngadto sa bisita nga dili taga Parokya ang mga giandam nga pagkaon. Malipayon kaayo sila nga miambit sa pagbati sa diwa sa kapistahan ni San Jose.

Gisugdan na usab ang bag-ong proyekto sa Parish Social Action ang tabang “Pabalay ni San Jose” Busa niadtong Mayo 1 sa hapon gipahigayon ang blessing ug turn over sa gipaayo nga balay ngadto kang Leonila de la Peňa, usa ka balo nga babaye taga GKK MOPH, Sasa.

Kini pinaagi sa makugihon nga Ways and Means Committee sa hamubo nga panahon nakahimo og tabang sa pag-ayo sa usa ka panimalay. Ug gitinguha nga ipadayon kini, sa pagtabang niadtong nanginahanglan kaayo nga ayuhon ang maong pinuy-anan.

Ang homiliya ni Fr. Bong sa kapistahan mao nga “isip kita mga piniyalan sa mga gasa sa PAGTUO diha sa Ginoo nga gipuy-an ni San Jose, nga unta masundog nato kini sa atong kinabuhi. Adunay upat ka mga gasa sa pagtuo nga iyang gipasabot kanato mao ang gasa sa pagdawat, pagpalambo , pagpa-ambit sa mga grasya ngadto sa uban ug gasa sa pagpasalamat ngadto sa Ginoo.

Pangutana niya, “inyo bang gipalambo ang gasa sa pagtuo? Gipa-ambit ba kini ngadto sa uban? Mapasalamaton ba ikaw sa mga grasya nga nadawat?” Tungod ni Fr. Bong ang Parokya buhi ug abtik nga nagalihok, naningkamot alang sa pagtabang sa panginahanglan sa Simbahan. (Amie Desquitado | Photo credits: Angelie Alonzo, Amie Desquitado)