Youth Circles of Discernment for Empowerment

Tungod nagkaduol naman ang adlaw sa piniliay karong umaabot nga Mayo 2022, ang atong arkidayoses sa Dabaw uban sa Davao Association of Catholic Schools (DACS) nagpahigayon og usa ka kalihokan nga “Youth Circles of Discernment for Empowerment” diin kini makatabang sa pagpalambo sa panlantaw sa mga kabatan-onan nga mopili og moboto sa angayan nga mangulo sa atong panggamhanan. Kining maong kalihokan gimugna aron mamahimong atong giya para makapahigayon kita og katuohan, matinud-anon, tukma, makahuloganon, ug malinawon nga piniliay.

Niadtong Marso 6, 2022 gipahigayon sa Immaculate Conception Vicariate ang “Youth Circles of Discernment for Empowerment” diin usa sa mga partisipante mao ang Parokya sa Virgen Dolorosa, og tungod kay padayon paman ang hulga sa maong virus nga Covid- 19 ang Virgen Dolorosa nagpadala lamang og tulo ka mga representante sa kabatan-onan. Ang maong mga representante usab ang gihatagan sa tahas nga magpadayag/ mag re-echo sa ilang kasinatian sa maong kalihukan. Ang vicariate nga kalihukan gipangulohan ni Ms. Mary Ann Almeria ang representante gikan sa arkidayoses sa Dabaw.

Gipahigayon ang pag re-echo niini ngadto sa mga batan-on sa Virgen Dolorosa niadtong Marso 26, 2022, diin gi-imbitahan ang mga batan-on gikan sa 58 ka mga Gagmay’ng Kristohanong Katilingban (GKK). Gipangulohan kini sa tulo ka reprensentate nga naka tambong sa vicariate nga lebel sila mao si Mr. Armel John Arellano, Ms. Cloville Almedora, ug Ms. Charlotte Creta nga mga miyembro sa Commission on Election (COMELEC) ug Social Communication Commission (SOCCOM) sa mga batan-on. Sulod sa maong kalihukan gipahinumdoman ang mga partisipante sa pagdala og ilang kaugalingon nga Bibliya ug gamit sa pagsulat.

Subay sa maong panagtigom adunay powerpoint nga giandam para sa hapsay nga dagan sa programa. Gigamit usab ang Letio Divina nga usa ka pamaagi sa pagbasa sa Balaang Kasulatan. Nakalakip niini ang pagpamalandong sa usa ka tudling sa Bibliya, labi na ang Ebanghelyo sa maong adlaw. Human sa mga pagbasa adunay naka andam nga mga pangutana nga kinasing-kasing usab nga gi tubag sa mga kabtan-onan. Ang maong kalihuokan naka abli usab og pultahan alang sa mga kabatan-onan nga maka higayon sa pagpa-ambit sa ilang mga kasinatian, kalipay man kini o kasakit.

Sa pagtapos sa maong kalihokan, gipahinumdoman ang matag usa sa mga partisipante sa kabililhon sa ilang tagsa-tagsa ka mga boto. Nga ang pagpili sa angayan nga mamahimong magdumala sa atong panggamhanan. Atong hinumdoman ang nahisulat sa Panultihon 29: 2 nga nagkanayon “Kon matarong ang nangulo, magmalipayon ang mga tawo. Apan kon daotan ang namunoan, mag-antos ang katawhan.” (Princess Danica R. Sepada)