Unang Face-to-face Presbyterium Human Sa Pandemya Gipahigayon

Unang Lunes sa Abril gipahigayon didto sa Our Lady of Assumption Parish, Torres Street, Davao City ang binulang panagtapok sa mga kaparian sulod sa Arkidayoses sa Dabaw nga nagmakahuloganon, tungod kini ang unang face-to-face meeting sulod sa duha ka tuig tungod sa pandemya. Gikalipay sa kadaghanan kining higayon sa panagtapok tungod kay mas mabati kuno ang “fraternity among brothers” sumala pa ni Fr. Elvie Bordios.

Pulong sab ni Fr. Marbendear, refreshing kuno nga makita ang mga kaubanang pari apan duna say kasubo tungod naay mga panagway nga wala na makit-i kay sila mipanaw na. Apan luyo niini makita gihapon ang hangop sa matag pahiyom gamit ang mga mata ug tungod niining face-to-face meeting mabati ang presensya sa incarnational church.

Usa sa mga nahisgutan sulod niining meeting mao ang reporting sa mga syntheses gikan sa St. Francis Xavier College ug Regional Major Seminaries kauban usab ang synthesis sa mga myembro sa Archdiocesan Coucil of the Lay Apostolate and Integrated Movements kon ACLAIM.

Bisan tuod wala kaayoy exposure ang mga seminarista sulod sa duha ka tuig, nagpabilin gihapon kanila ang paghunahuna alang sa mga layko nga nagkinahanglan sa pagtagad sa simbahan. Sama niining mga katawhan sa gawas, uhaw sab sila diha sa mga pormasyon nga mas maka palawom ug maka palig-on sa ilang pagtuo.

Ang syntheses nga gibasa ni ACLAIM Director Fr. Marbendear Morallas nagpaambit sa inspirasyon nga nahatag sa milabay nga konsultasyon diha sa mga layko tungod nabati nila ang “visible sign of the invisible presence of the Lord”. Ang mga kasinatian nga naghatag ug pondasyon sa ilang pagka Katoliko mao ang kasinatian nga nagsugod sulod sa GKK ug sumala pa kanila, ila kining padayonon.

Dako gyod kaayo ang kalambigitan sa mga Gagmayng Kristohanong Katilingban sa pag-umol sa atong pagtuo. Ug tagaan kini ug dakong pagpasidungog sa atong pagsaulog sa 50 ka tuig sa mga Basic Ecclesial Communities kon GKKs dinhi sa atong Arkidayoses sa Hunyo 10 hangtod 12.

Matod pa ni Most Rev. Romulo Valles sa iyang shepherd’s time, nalipay siya tungod kay ang mga myembro sa ACLAIM nahinay hinay na ug bira sa mga parokya ug GKK diha sa pagsalmot sa nagkalain-laing mga aktibidades. Ang pag-apil sa mga myembro ug pagpakabana sa mga kalihokan sulod sa parokya maoy nag pahinumdom kanato nga kita kabahin sa mas labing dakong simbahan. (Photos: Victoria Estoque)