Si Jesus: Tuburan sa Lawod sa Grasya sa Kaluoy

Ika-duhang Domingo sa Pagkabanhaw (April 24, 2022)
Acts 5:12-16 / Ps 118:2-4, 13-15, 22-24 / Rev 1:9-11A, 12-13, 17-19 / Jn 20:19-31

Ang tawo madudahon. Ang tawo buot gayod manigurado. Ang tawo buot gayod nga adunay makita aron motuo. Halayo ba kita niining mga larawan sa kinaiya sa tawo?

Ang mga pagbasa karong Domingo sa Kaluoy, naghisgot sa mga tawong mituo busa naayo; mituo busa nahatagan sa kinabuhi. Apan ang atong ebanghelyo naghisgot sa tawong nagduda, nanigurado, dili motuo kon dili makakita. Mao kana ang pagkatawo ni Tomas. Nganong naingon niana si Tomas? Nasayop siya sa iyang pagpahimulag uban sa iyang mga kaubang apostoles. Nagpalayo siya kanila. Nag-inusara siya. Napakyas siya sa higayon nga makita si Hesus nga nabanhaw.

Mao kana ang mahitabo kon magpahilayo ang tawo sa katilingban. Tungod kay buot niyang mag-inusara kanunay, madali siyang mawad-an sa paglaom, maglisod pagpanalipod sa kaugalingon o maghunahuna na hinoon nga walay bili ang kinabuhi, ilabi na kon mohimulag kita sa Dios. Dugang pa, adunay mga higayon nga ang tawo mapakyas sa pagtabang o sa pagpakiglambigit sa isigkatawo. Kon mahimulag ang tawo sa Dios ug sa iyang isigkatawo dili niya masinati ang gugma ug pagpakig-uban kang Hesus diha sa iyang katilingban.

Apan ang nakapahinuklog ning mga panghitaboa mao ang mga pulong ni Hesus diha sa ebanghelyo : “Dawata ang Espiritu Santo. Kon pasayloon ninyo ang mga sala sa mga tawo, gipasaylo kini….” Mga pulong nga naghisgot sa kamahinungdanon sa Sakramento sa Panag-uli”.

Si Tomas, sa iyang pagka-amgo sa iyang sayop, nakapangayo sa pasaylo. “Ginoo ko ug Dios Ko”. Sa diha nga segurado na si Tomas, siya nagmatinud-anon ug mihatag sa iyang kaugalingon sa hingpit nga paagi ngadto kang Hesus.

Sa atong bahin, daghang mga higayon nga nahisama kita kang Tomas, ilabi na kon atong makita nga dili nato kinahanglan ang panabang ni Hesus tungod kay nakatutok ang atong mga mata sa kaugalingon, sa atong kapasidad sa pagkinabuhi, sa bahandi ug labaw sa tanan, halayo sa Dios, tungod sa sala. Wala nato kinahanglana ang Dios. Sama kita sa madudahong si Tomas, kinsa wala molantaw kang Hesus nga angayang sundon, higugmaon ug alagaran. Tukma nga karong adlawa gitawag nga Domingo sa Kaluoy, tungod kay luyo sa mga sala ni Tomas, iyang nadawat ang kaluoy ug pasaylo ni Hesus kinsa mao ang tuburan sa lawod sa grasya sa Kaluoy.