San Jose, Tawong Mapamalandungon

Kakutloan gayod ang mga pulong ni Reberendo Padre Pete Lamata sa iyang pamalandong niadtong ika-21 nga pista sa GKK San Jose sa Davao Empress Community adlawng Sabado, Marso 19. Siya nagpunting sa pagka ehemplo ni San Jose isip tawong mapamalandungon. Diha sa pagpamalandong ni San Jose, gitabangan siya sa Diyos pinaagi sa iyang damgo ug sa pag-ingon sa anghel nga si Maria nagsabak sa lalang sa Espirito Santo naabri ang iyang salabutan ug mituman sa kabubut-on sa Diyos aron matuman ang kasulatan ug dinhi gisubay ang maong tema sa kapistahan nga: “Katilingban ni Sr. San Jose, naningkamot sa pagkab-ot sa kamatuoran sumala sa kabubut-on sa Diyos”.

Apan dili nato hikalimtan nga una niya makaplagan kining maong giya sa kamatuoran, siya nabalaka pag-ayo. Tawo ra usab siya nga malibog ug mabalaka. Ang iyang lawom nga pamalandong inubanan sa kinasing-kasing ug tinuoray nga pag-ampo.

Sumala pa ni Fr. Pete, sa atong kinabuhi wala tay kontrol sa atong palibot ug wala ta mahibalo sa dagan sa atong kahiladman. Kasagaran ug naa tay problema, sa atong panahon muadto kita sa lugar nga anaay kidlap-kidlap. Ang palibot dili palibot sa kalinaw ug musamot ug hatag kanato ug problema.

Kinahanglan kunong sundon nato ang ehemplo ni San Jose nga naghilom ug namalandong sa halawom. Diha sa kahilom sa iyang kaugalingon, naay kalinaw, naay kahapsay, kahan-ay sa huna-huna ug pagbati.