Panagtapok sa Diocesan Clergy gibalik

Ang Fraternity of the Diocesan Clergy of Davao kon FDCD nagpahigayon sa ilang Easter Monday Gathering niadtong Abril 18, adlawng Lunes sa Regional Major Seminary sa Catalunan Grande. Kini usa ka whole day activity nga kaniadto gakahitabo kaupat ka beses sa usa ka tuig apan naundang niadtong pagsugod sa pandemya. Sa ilang pagbalik niini nga panagtigom nagmalipayon ang tanan dili lamang tungod sa mga recreational activities sama sa sports ug fellowship panahon sa pagpangaon apan apil usab ang mga mahinungdanon ug bililhon nga mga pormasyon sama na lamang sa gihisgutan nga current civil laws nga gipaambit ni Fr. Agustin Nazareno nga usa sab ka abogado. Kini nga hilisgutan nagpasabot nga sila sab bisan tuod mga pari, mga citizen o lungsoranon ug kinahanglang mahibalo gihapon sa mga balaod sa nasod tungod sila kabahin man niini.

Human sa mga pipila ka mga pangutana, mipadayon ang maong panagtigom diha sa mga pahibalo pinaagi ni Msgr. Julius Rodulfa, Episcopal Vicar for the Clergy. Ubay-ubay sab ang mga sugyot alang sa kaayohan sa tanan, hilabi na sa mga plano alang sa pag retiro ug pag amuma sa mga katigulangang pari.

Misunod ang santos nga misa nga gipangulohan ni Rev. Fr. Jesus Samaniego inubanan sab ni Msgr. Edgar Labagala nga maoy naghatag sa pamalandong tungod nga nag selebrar sila sa ilang anibersaryo sa pagkpa pari adtong adlawa. Ang mga jubiliarians sa milabay nga duha ka tuig uban sa mga magsaulog sa ilang jubilee karong tuiga apil sab sa mga concelebrants sa maong misa. Ang mga jubilarians karong umaabot nga Hulyo 31 mao sila: Rev. Fr. Ritsche Gamaya, Rev. Fr. Cirilo Bermudez, Rev. Fr. Nestor Dalumpines, Rev. Fr. Romeo Axalan, Rev. Fr. Antonio Ferrer ug Rev. Fr. Rico Enriquez.

Sumala pa ni Msgr. Ed Labagala, adunay usaka pari nga Salesian nga maayo kaayo muhatag ug mga introduction ug paambit niya: “there are 2 useless things in this world, one is to light a candle at noon time and second is to give homily to priests”. Apan luyo niining komedya, nagpadayon siya ug iyang gihatagag duso ang kaimportante sa pagbaton nga dili silang mga pari ang nagpadagan sa simbahan. Bisan dako sa ilang buot nga mutabang sa katawhan ug sa ilang pagpaningkamot nga palambuon ang parokya, wala sa ilaha ang gahom sa pagpadagan sa simbahan.Human sa misa dunay gamay nga panag-ambitay sa mga pagkaon panahon sa paniudto ug dayon misunod ang mga sports activities sama sa lawn tennis, badminton ug ang pinaka gikahidlawan o gikamingawan nga basketball. Aduna say midaog sa free throw ug 3-point shootout nga mao sila Fr. Mervin Maglana ug Fr. Kim Samones.

Daog sa lawn tennis doubles sila Fr. Dexter Veloso ug Fr. Junar dela Victoria ug sa basketball daog ang Team B nga gilangkuban sa mga highest pointers nga sila Fr. Kim Samones, Fr. Arnold Balaquinto, Fr. Raul Nieves ug Fr. Mervin Maglana.

Panahon sa panihapon gipang hatag ang mga premyo sa nagkadaiyang mga dula. Sumala ni Fr. Roy Mejias nilaom siya nga mahibalik na ang upat ka higayon sa panagtapok sulod sa usa ka tuig ug nga ang musunod nga tapok panahon sa pista ni St. John Mary Vianney sa Agosto. Nagmapasalamaton siya tungod kay naa sa 66% ang attendance sa clergy niadtong adlawa.