Pagsira sa Porta Sancta sa Santiago Apostol Bunawan

Malipayong gisaulog sa mga parokyano sa St. James the Apostle Parish, Bunawan, Davao City ang Dominggo sa Pagkabanhaw sa Ginoo tungod kay kining adlawa usab ang Pagsira sa Balaang Pultahan, isip usa sa Jubilee Churches sa Archdiocese of Davao nga gipili sa paghandum sa ika-500 nga anibersaryo sa Kristiyanismo sa Pilipinas niadtong Abril 17, 2022, alas 4:30 sa hapon. Gituohan nga ang pagsulod sa Sagradong Pultahan ug Jubileo nga mga Simbahan susama sa paghimo sa usa ka panaw ngadto sa balaang lugar ug nga kini adunay espirituhanon ug pastoral nga kahulogan. Ang selebrasyon gipangulohan sa Arsobispo sa Davao, Most Rev. Romulo G. Valles, D.D. ug kaubang nagsaulog ang Kura Paroko nga si, Rev. Fr. Rolando O. Mandreza, D.C.D.

Atol sa iyang homiliya, iyang gihatagan og gibug-aton nga ang Balaan nga mga pultahan gimugna isip usa ka tuig selebrasyon uban sa pag-uyon ni Pope Francis, sa pinili nga mga parokya sa pagtukod sa ilang kaugalingong Balaan nga mga Pultahan ug bulahan nga napili ang St. James the Apostle Parish isip usa sa mga simbahan sa Archdiocese sa Davao. Ang pag-abli niana sa sagradong pultahan nagpakita sa pasalamat sa pagtuo. Ang atong giambitan nga pagtuo mao ang nagbugkos kanato. Gipaambit usab niya ang mga punto gikan sa unang pagbasa gikan sa Mga Buhat sa mga Apostoles, nga naghulagway sa katawhan, nga iyang gipakasama sa usa ka pultahan o portal nga nagtanyag kanato sa mga paghandom kung giunsa kita paghigugma sa Dios nga klaro nga gipakita pinaagi sa paghatag kanato sa Iyang bugtong nga anak alang sa kapasayloan sa atong mga sala.

Arsobispo Romulo G. Valles, D.D. nga nangulo sa pagsira sa Porta Sancta sa Santiago Apostol Bunawan nga kuha gikan kay Lawrence Vidanes.

Sa katapusan, makita ang kalipay sa Arsobispo sa iyang pagpadangat sa iyang pasalamat sa kura paroko ug sa iyang mga parokyano, ilabi na nga nakasaksi siya og dakong gidaghanon sa mga batan-on nga nagserbisyo ug nagsaulog sa misa. Gihatagan usab niya og gibug-aton ang panginahanglan alang sa mga hamtong sa pagbansay ug pagpasa sa ilang mga kasinatian ug pagtuo ngadto sa mga batan-on aron sila magpadayon sa pagmahal sa pagtoo, ingon sa nakita sa pagkabanhaw sa Ginoo. Busa, ang tanang parokyano sa St. James Parish Bunawan gibati nga bulahan sa pagtambong sa maong selebrasyon. (An-Jean V. Naraga-Moneba / SJAP SocCom)