Nabanhaw’ng Dios ug Maglilig-on

Ika-tulong Domingo sa Pagkabanhaw (May 1, 2022)
Acts 5:27-32, 40B-41 / Ps 30:2, 4, 5-6, 11-12, 13 / Rev 5:11-14 / Jn 21:1-19 Or Jn 21:1-14

Ang atong pagbasa sa ebanghelyo karon nagpunting mahitungod sa pagpakita ni Jesus sa iyang mga tinun-an. Ang mga tinun-an sa ilang pagkadismaya sa ilang magtutudlo nga ilang gilauman nga magluwas kanila gikan sa kaulipnan sa mga langyaw nga mga Romano namalik sa ilang karaang gimbuhaton. Tungod sa dili nila madawat nga panghitabo sa atong Ginoong Hesus nga diin iyang giula ang iyang kaugalingon didto sa krus. Sila wala gayod makasabot sa gihimo sa ilang magtutudlo ug gusto silang mobalik sa ilang naandang pagkinabuhi. Apan ang atong Ginoong Hesus wala mihunong sa pagpasabot kanila, wala siya mihunong sa pagpakita kanila, wala sila niya biyai sa hingpit. Gustong ipasabot sa atong Ginoo nga magkalawom ang ilang pag-ila ug pagsalig kaniya dili lang sa kalibutanong pagsalig apan, ang pagsalig gayod nga anaa ang pagtahan sa kaugalingon og dili lang diha sa taphaw nga lebel sa pag-ila ngadto kaniya.

Niining ikatulong Domingo sa pagkabanhaw kita nga mga binunyagan mahisama unta kang Simon Pedro nga maisugon nga mosangyaw sa nabanhaw’ng Ginoo ug mas palabihon ang pagsunod sa mga sugo sa Dios kaysa sa mga bahad sa kinabuhi. Ang pagtoo nga gipakita ni Pedro diha sa Buhat sa mga Apostoles magdugang ug maghatag kanato sa kaisog nga mosaksi sa atong pagtoo ngadto sa nabanhw’ng Ginoo. Mas hatagan unta nato ug dakong pagtagad ang atong pagtoo kaysa sa mga naandan ug karaan natong pamaagi sa pagkinabuhi.

Ang pagpakita unta ni Hesus ngadto sa iyang mga tinun-an magdapit usab kanato sa pag-ila sa nabanhaw’ng Ginoo. Sama sa mga apostoles nga sa higayon nga nagdapit kanila ang Ginoo sa pagtaktak sa ilang pukot ngadto sa ilang tuo diha-diha sila nakakuha sa daghan kaayong mga isda ug nakaila dayon sila nga mao kadto ang Ginoo. Apan ang ilang kaugalingong pagpaningkamot, sa tibuok gabii nga sila naghago wala gayod sila nakakuha. Kon ang atong kaugalingong pagpaningkamot ang atong saligan dili gayod kita magmalampuson ug makapuyan kita pag-ayo. Apan kon anaa ang nabanhaw’ng Ginoo diha sa atong mga pagpaningkamot magmalampuson ug magmabungahon gayod kita. Atong hatagan ug higayon ang Ginoo nga mopadayag sa iyang kaugalingon nganha diha sa atong kinabuhi ug atong ipunting ngadto kaniya ang atong mga paghago.

Sa katapusan, ang Ginoo nga gikahibalag ni Simon Pedro ug sa mga apostoles mao usab ang Ginoo nga naghatag kanila sa Espiritu Santo aron sila magmaisugon sa pagpadyag sa ilang dakong pagtoo ug andam nilang iula ang ilang kinabuhi sa maong pagtoo nga nagsukad diha gayod sa ilang kasinatian sa nabanhaw’ng Ginoo. Kita gidapit usab sa susamang paagi nga atong ipasukad ang atong pagtoo nganha sa atong Ginoo nga atong gikahibalag diha sa matag-usa nga atong gikahinagbo sa atong kinabuhi. (Bro. Soren Abellanosa)