Mabanhaw pa pag-usab si Jesus?

Domingo sa Pagkabanhaw (April 17, 2022)
Acts 10:34A, 37-43 / Ps 118:1-2, 16-17, 22-23 / Col 3:1-4 / Jn 20:1-9

Makalipay gayud kaayo alang kanako ang pagpaminaw sa mga pari ug mga layko nga mibisita didto sa mga nabiktima sa Odette. Sa ilang pagpaambit miingon sila:”Yano ra kaayo ang among gibuhat. Gani ang uban kanamo namati sa mga pagpaambit sa mga molupyo, pagtabang sa pagpahiluna o mga games sa mga bata nga anaa sa ilang mga tolda ug pipila kanamo nagpas-an sa mga sako sa bugas o mga karton sa mga sardinas o unsa pa man ang among ikahatag kanila, apan ang nakapatandog kanila mao ang pagsaulog namo sa Santos nga Misa diin nahiasa sila.” Tinuod usa ka yano nga buhat apan nakahatag og dako nga kalipay tungod kay alang kanila ang among presensya usa ka pagpadayag sa gugma sa usa ka igsoon tali sa ilang mga minahal, nga mga kaigsuonan nga nag-antos. Usa ka buhi nga saksi nga makita diha sa lihok sa gugma sa Dios alang sa kalisdanan sa uban. Mao kini ang usa ka tinubdan sa paglaum kay alang kanila “naa pa diay mga tawo nga magdala sa kamatuoran, sa paglaum ug kalipay nga mao ang bunga sa pagkabanhaw ni Jesus.”

Mga higala, ang bunga sa pagkabanhaw ni Jesus naipakita sa atong igsoong mibisita sa mga biktima sa Odette. Usa lamang kini ka ejemplo sa daghang mabuhat sa tanang Cristyano nga nagtuo sa pagkabanhaw ni Jesus.

Ang unang mensahe sa Pakabanhaw ni Jesus nga atong gisaulog karong adlawa mao ang pagtuo. Kita gitawag sa pagtuo. Ang lawas ni Cristo wala kawata. Ang mga sanina anaa sa han-ay nga pagkahimutang. Ang gilubngan wala maguba. Busa dili na kinahanglan nga susihon o imbistigahon, Tinuod si Jesus nabanhaw! Busa ayaw na pagduhaduha, tuo!

Ang ikaduha mao nga kita gitawag nga mahimong mga saksi. Ang mga apostoles wala magsangyaw mahitungod sa walay sulod nga lubnganan. Ang ilang gisangyaw mao ang pagkabanhaw ni Jesus. Ilang gisaksihan ang iyang pagkabanhaw pinaagi sa ilang pagbag-o sa kaugalingon. Ilang gihatagan ug kahulugan ang ilang gisangyaw pinaagi sa ilang paghalad sa ilang kinabuhi hangtud sa ilang kamatayon.

Busa ang pagkabanhaw sa atong Ginoo nag-imbita kanato sa hingpit nga pagsaksi sa atong pagtuo ngadto kang Jesus. Pagpuyo nga puno sa paglaum, pagpuyo nga adunay halawom nga pagkamatinud-anon ngadto sa Dios ug sa atong isigkatawo. Pagdala sa kalipay ngadto sa mga nag-antus, sama pananglit sa gibuhat niadtong pisikal, materyal ug spiritual nga mitabang sa mga biktima sa Odette.

Naghagit kanato ang Pagkabanhaw sa pagkinabuhi sa hingpit nga pagsaksi kang Cristo, pinaagi sa kinabuhing malaumon, malipayon, maalagaron, maabiabihon, masaligon ug uban pa…ug dili kinabuhing madudahon, mahukmanon, mapahitas-on ug uban pa. Mga higala, maglakaw kita sama kang Maria, kang Pedro ug kang Juan gikan sa kangitngit sa pagbangotan ug pagduda ngadto sa kabuntagon sa kalipay ug paglaum. Tinuod mabanhaw si Jesus diha sa mga matuod nga Cristyanos. Amen!