Luyo sa mga Kaguol, Anaa ang Diosnong Kalooy

Ang kasinatian sa usa ka devotee sa Divine Mercy Apostolate maoy nakapa-aghat sa mga myembro sa katilingban nga magdebosyon sa Diosnong Kalooy.

Nagsugod ang Katilingban sa Birhen sa Fatima, Emily Homes, Cabantian sa pagdebosyon sa Diosnong Kalooy kon Divine Mercy niadtong Hunyo 19, 2020 diin kada adlaw moadto sa kapilya aron sa pag-ampo sa 3 o’clock prayer, Divine Mercy Chaplet, ingon man ang Santos nga Rosaryo. Sa primerong bulan, gamay ra ang mitubag sa debosyon, tungod kay mahadlok pa ang uban mogawas sa ilang mga panimalay kay adunay virus nga COVID-19. Nagpadayon lang gihapon sa pag-ampo hangtud nga daghan na ang mitubag sa maong pagdebosyon. Ang nagdasig ug nag-agni sa mga myembro sa katilingban sa maong debosyon mao si Mrs. Noelita Avellana. Wala siya’y kakapoy sa pag-ampo ug pangpangalagad sa Katilingban.

Sa pagsulod niya sa sakramento sa kaminyoon diha nagsugod ang iyang pagdebosyon sa Diosnong Kalooy kon DIVINE MERCY, dili siya opisyal nga myembro sa maong Apostolado sa Divine Mercy pero naga-apil na siya sa kahigayunan nga motambong sa mga pagtulon-an ug sa mga pag-ampo sama sa 3 o’clock prayer ug Chaplet sa tanang panahon ug sa siyam ka adlaw nga pagnobena ilabina sa mga panahon nga makasinati og kalisdanan sa kinabuhi ug sa pagtambong sa Santos nga Misa sa kapistahan sa Divine Mercy.

Nasinati niya ang unang milagro sa Diosnong Kalooy pinaagi sa iyang inahan nga naospital tungod sa sakit nga cancer diin anaa na siya sa malisod nga kahimtang ug niadtong tungora iyang gipangtawag na ang iyang mga igsoon aron sa pagpanamilit. Tungod kay siya ang nagbantay sa ospital ug samtang naghulat siya sa iyang mga igsoon iyang gihunghongan ang iyang inahan nga mag-ampo sila sa Divine Mercy Chaplet. Tungod sa pagbalik-balik niya sa pag-ampo nakatulog ang iyang inahan ug nakamata na lang pag-abot sa iyang mga igsoon. Tungod sa milagro sa Diosnong Kalooy nabaskog ang iyang inahan ug pagka ugma gipagawas na siya sa doktor sa ospital diin nalugwayan pa ang kinabuhi sa iyang inahan sa mikabat pa og tuig ug namatay nga malinawon.

Dugang kasinatian ni Mrs. Noelita Avellana sa milagro sa Diosnong Kalooy sa diha nga gikawat ang iyang handbag sa kan-anan sa Bajada diin sila nangaon sa iyang anak. Pagkahuman nila pagpangaon pagtan-aw niya wala na ang iyang bag nga gitapad niya sa lingkuranan. Naguol siya kaayo tungod kay naa didto ang importanteng mga dokumento sama sa passport ug Visa diin molarga siya sa laing nasud sa sunod nga bulan.

Nagpakimalooy siya sa DIVINE MERCY, magmata siya sa alas tres sa kadlawon aron sa paghalad og pag-ampo sa chaplet nga nangandoy nga mabalik ang mga importanteng dokumento bahala na ang ubang sulod sa bag dili na mabalik.

Puno gayud siya sa kalooy kay sulod sa tulo ka adlaw gitawagan siya sa opisina sa St. Mary of the Perpetual Rosary Parish diin adunay nangita sa iya nga tao kung unsaon pag-uli sa iyang wallet ug passport nga nakita sa iyang tauhan nga nag-repair sa aircon sa KTV bar sa Torres street. Ang giya sa maong tao nga instrumento sa pag-uli sa iyang wallet ug documento mao ang numero sa telepono sa parokya nga iyang gisoksok sa maong wallet.

Buhi gayud ang presensya sa Diosnong Kalooy!

(Lani Arbiol Lucero, GKK SoCCom)