Gugma sa Dios diha sa Krus

Domingo sa Pagpasakit sa atong Ginoo (April 10, 2022)
Is. 50:4-7 / Ps 22:8-9, 17-18, 19-20, 23-24 / Phil 2:6-11 / Lk 22:14—23:56

Ania na gayod kita sa lintunganay sa atong pagpangandam diha sa panahon sa kwaresma. Ang Domingo sa pasyon sa atong Ginoo nag-andam kanato sulod niining semana nga diin atong sination ang dakong gugma sa Dios diha sa iyang paghatag sa iyang kaugalingon bisan diha sa kamatayon sa krus. Ang Dios nga nagpakatakos sa pagpakig-uban kanato ug karon atong gihukman sa kamatayon tungod sa atong mga sala. Ang Ginoo ang nagbayad sa tanan tang mga utang ngadto sa Dios.

Ang gihimo sa atong Ginoong Jesukristo usa ka panag-ingnan natong tanan nga ang Dios dili diay layo kanato apan siya ang naghimo og dalan aron kita mahibalik ngadto sa Amahan. Ang pagpas-an, pagpasakit, ug pagpakamatay sa atong Ginoo usa ka kahigayonan nga atong makit-an aron kita mamahimong takos nga makig-uban sa Dios.

Ang krus nga nagsimbolo sa kapildihan diha sa kalibutanong panglantaw apan diha sa Dios usa ka kadaogan nga maghatag og paglaum kanatong tanan sa atong pagsulod sa gingharian sa Dios. Ang krus nga nagsimbolo sa kaalim sama sa gihimo ni Moises didto sa kamingawan nga diin ang mga Israelita gipamaak sa mga bitin ug ang Dios nagsugo kang Moises nga maghimo og usa ka tukon nga tumbaga ug iisa kini nga kon si kinsa kadtong mapaakan sa bitin ug molantaw niini mamaayo gayod. Sa samang paagi si Jesus giisa diha sa krus nga si bisan kinsa kadtong molantaw kaniya makabaton sa kinabuhing walay katapusan.

Ang paghigugma sa Dios sa iyang katawhan wala gayoy sukod. Bisan ang kasakit nga giantos sa Amahan ug pisikal nga kasakit nga giantos sa Anak, apan ang dakong gugma nagpatibabaw gayod. Ang gugma sa Dios nga naghatag sa bag-ong pagkatawo kanako, kanimo ug kanatong tanan. Ang Dios nga unang nahigugma kanatong tanan nga bisan sa atong pagkamakasasala apan siya mipadayon sa paghigugma.

Sa katapusan, ang gugma sa Dios magdala kanato ngadto usab sa paghigugma sa atong mga kaigsuonan. Ang gugma nga atong nabati, ato gayod nga ipaambit ngadto sa uban. Ang gugma takos gayod nga ikapadayag ngadto sa uban, mao nga ang Ginoong Jesus nagpakita sa dakong gugma sa iyang mga mamumuno “Amahan ko pasayloa sila kay wala sila masayod sa ilang gihimo”. Usa ka kamatuoran nga makita lamang diha sa mga mata sa Dios. (Bro. Soren Abellanosa)