Gidihugan sa Balaang lana ang 400 ka Kompirmante

March 25 – Human milabay ang duha ka tuig sa pandemya, naka patigayon na pag-usab ang simbahan sa Imaculada Conception kon Immaculate Conception sa Mintal ug sakramento sa kompirma. Gipangulohan ni Most Rev. Romulo G. Valles, arsobispo sa Dabaw ang pag kompirma sa kapin kwatro syentos ka mga kompirmante nga kadaghanan nag edad sa dose hantgtod disi sais. Kini nahitabo atol usab sa adlaw sa pag konsagrar sa mga nasod Ukraine ug Russia diha sa putling kasing-kasing ni Maria.

Kon ang sakramento sa bunyag, maghatag kanato ug bag-ong kinabuhi, ang sakramento sa kompirma maoy mupalig-on niining Kristyanong kinabuhia pinaagi sa mga gasang gipiyal kanato sa Espirito Santo. Dinha sulod sa sakramento sa Eukarestiya, nahitabo ang pagbag-o sa mga panaad isip mga binunyagan. Mas makahuloganon na kini tungod ang mga bata, aduna nay saktong buot aron masabtan ang ilang mga panaad atubangan sa nabanhawng Jesus.

Pipila sa akong mga nahinabi ang mga bag-ong kinasal nga gitagaag pagtugot sa simbahan nga maulahi ang pagdawat sa sakramento sa kompirma tungod sa hugot nga mga safety protocols sa gobyerno. Nindot nga aksyon sa simbahang Katoliko ang pagsabot sa mga parokyano nga naglisod ug kumpleto sa ilang mga requirements sa kasal. Dako ang pasalamat ni Mary Grace, baynte-singko anyos ug parokyano sa Imaculada Conception kay gitugotan sila sa iyang bana nga matagaan sa clearance aron makasal sa Our Lady of Lourdes Bankgal bisan wala pa siya ma kompirmahan. Ug sa iyang bahin, wala siya makalimot sa iyang panaad nga muapil gayod sa panahon nga mahitabo na ang sakramento.

Nakita dinhi kung giunsa pag pahiangay sa simbahan ngadto sa mga panginahanglan sa ilang mga parokyano karong panahon sa pandemya. Usa pa ka pagpahiangay ang nahitabong pag hulip sa mga katekista sa mga gitawag ug ninong o ninang sa kompirma. Sila maoy mibarog isip simbolo sa god parents sa mga kompirmante aron usab dili kaayo daghan ang mga tawo sa sulod sa simbahan.

Wala panumbalinga ni Archbishop Valles ang kadaghanon sa iyang dihugan sa balaang lana ug malipayon siyang mipaambit nga luyo sa pandemya ang katawhan nagmanggihatagon gihapon. Gani kining mga kompirmante, boluntaryo nga midangop sa simbahan ug dili pinaagi sa pakig koordinar sa mga eskwelahan. Tingali ug mas daghan pang mga kabatan-onan ang miapil kon gipaagi kini sa mga public ug private schools sa Barangay Mintal.

Sa pagtapos sa misa, gihalad na diha sa putling kasing-kasing ni Maria ang mga nasod Russia ug Ukraine pinaagi sa hugot nga pag-ampo nga puno sa paglaom.