“Ang tanan Ipasa-Diyos”

Si Msgr. Bonifacio Burlaza, natawo niadtong Disyembre 12, 1942 sa lungsod sa Digos, apan midako sa Bansalan Davao del Sur, Ang iyang kabatan-on nabansay sa pagka-Kristyanong Katoliko bisan sa nag-eskwela pa siya sa elementarya pinaagi sa iyang inahan. Siya misulod sa seminaryo sa pagsugod niya sa high school didto sa St. Francis Xavier College Seminary sa syudad sa Davao.

Atong nasayran gikan sa mga pagsaksi sa iyang mga natudloan nga mga lideres sama kang Rodelio (Bobot) Ang, ug sa iyang asawa nga si Mercy uban sa ilang usa ka kauban sa leadership training, nga si Dory Manlulu; mga sakop sa katilingban sa “Divine Mercy in my Soul” nga ilang nasaksihan ang bitoonong lamdag sa kinabuhi ni Msgr. Boni ang iyang pagka – “Simplicitas et Humilitas” o pagkayano ug pagkamapaubsanon.

Si Msgr. Bonifacio Burlaza, nakabsan sa kinabuhi sa buntag sa Marso 29 sa pangidaron nga 79 didto sa San Pedro Hospital. Nahinumdoman nga niadtong tuig 2019, bulan sa Disyembre iyang gisaulog ang iyang ika-50 nga anibersaryo sa iyang pagkapari pinaagi sa Santos nga Misa didto sa Parokya sa San Pedro Cathedral.

Matud pa ni Bobot Ang, ang mga panghitabo sa iyang pagkapari dili gayud sayon ilabi na sa iyang pagtuman sa mga tahas nga gisangon kaniya, mga hagit ug mga pagsulay, apan luyo niini siya moingon: “Ipasa-Diyos ang tanan”.

Alang kang Mercy Ang, si Msgr. gasa gayud sa ilang katilingban nga “Divine Mercy in my soul” ilabi na pinaagi sa iyang mga ehemplo ug gipanudlo nga han-ay kaayo. Siya ang nagiya kanila sa pagsabot kon unsa gayud diay ang mga sangon kon magdeboto kita sa “Divine Mercy”. Tungod usab sa iyang mga pagpanudlo, nahimo silang responsable sa ilang mga tahas sa GKK ug sa parokya. Dugang usab ni Dory Manlulu usa sa mga gipalambo ug gipatubo nga speaker sa ilang grupo, nga si Msgr. gayod ang founder sa “Divine Mercy in my Soul”. Miingon usab siya nga si Msgr, kanunay nga mopahimangno kanila nga “everything is grace from God! Ang tanan grasya sa Dios” Busa ibalik kining tanan ngadto Kaniya pinaagi sa misyon. Dili gayod niya palabyon ang higayon sa pagpakita ug pagdayeg sa mga tawong nakahimo sa tukmang buluhaton alang sa kaayuhan sa katawhan nga ilang gikahimamat sa ilang misyon sa pagsangyaw o pagpasabot sa Divine Mercy. Gikalipay pag-ayo sa ilang mga sakop ang iyang pagpahalipay ug pagdayeg kon makahimo sila sa tukmang pamaagi nga iyang gitudlo kanila.

Tungod lagi kay nakahuman man si Msgr. sa “Doctorate Degree in Biblical Theology” didto sa Angelicum Pontifical University of St. Thomas Aquinas, sa Roma, Italy. Dugangan pa sa “Doctorate in Psychotherapy” didto sa Pennsylvania, USA, ug “Diplomate in Canon Law” sa Trinidad ug Tobago, nakita sa daghang mga nakaila kaniya nga maalamon kaayo siya ug puno sa gugma sa pagka-maalagaraon. Nadugangan pa ang iyang kaalam sa dihang nagtuon siya sa Edukasyon, dinhi sa siyudad sa Davao.

Daghang mga tahas ang gisangon kaniya, sama nga siya nahimong unang Pilipinong Diosesanong Pari sa Davao isip Vicar General gikan sa tuig 1978 hangtud 1998 sa panahon ni kanhing Arsobispo Antonio Mabutas, ug nahimong unang Pilipinong diocesanong pari isip Direktor sa Eskwelahan sa mga Katekista nga ginganlan og John XXIII Catechetical Center.

Siya usab nangatungdanan isip pangulo sa Archdiocesan Pastoral Assembly of Davao I and II, ug pangulo sa secretariat sa Unang Mindanao-Sulu Pastoral Conference (MSPC I) sa tuig 1974 sa Davao ug sa mga mosunod nga mga panagtagbo sa MSPC.

Siya usab nahimong unang Pilipinong Kura Paroko sa Our Lady of Fatima Parish nga gitukod sa mga paring PME nga sa prances Pretres de Missions Etrangeres kon Fathers of the Foreign Mission Society. Nahimo usab siyang kura paroko sa San Pedro Cathedral, St. Jude Thaddeus, Sacred Heart of Jesus sa Obrero, Sto. Rosario sa Toril ug St. Francis de Assisi sa Tibungco.

Ang katapusan niyang sangon mao ang pagkahimo niyang misyonero ngadto sa Castries, St. Lucia, Caribbean Region sa West Indies mga tuig, 2006-2015 ug pagkahuman niadtong misyon, nahibalik siya sa Pilipinas diin mitabang siya sa mga nagtubong mga organisasyon, mga sector ug mga parokya.

Mapasalamaton nga inubanan sa pagbati ang mga katapusang pulong sa mga tawong among gipangutana mahitungod sa ilang pagka-ila kang Msgr. Bonifacio Burlaza. Matud pa nila, dili gayod nila hikalimtan ang mga gitudlo ni Msgr. Ilabi na ang pagpahiduol kang Kristo nga atong Ginoo, luyo sa daghang mga kasakit ug kakulian sa kinabuhi. (Interviewer: Sr. Federica G. Dalaguit uban sa Coverage Team: Dexter Amores and Dante Palma)