Ang Plano Sa Diyos Nga Mahiduol Sa Tawo

Sumala pa sa mga pulong ni Most Rev. Romulo G. Valles sa iyang pamalandong niadtong kapistahan ni San Jose bana ni Maria, adlawng Sabado Marso 19, ang desenyo sa plano sa Ginoo aron mapaduol sa tawo, dili ang pagpadala sa usa ka manunubos nga kusgan apan ang pagpakatawo sa Diyos nga gamhanan.

Kinomedyang pag-ingon ni Archbishop diha sa mga taga GKK San Jose sa Elenita Heights nga tungod sa panghinaot sa Diyos nga maluwas kita, mamahimo unta siyang magpadala ug mga katawhan nga susama nila Captain America o ni Superman “ug sa mga batan-on pa kanang isog kaayo murag transformer kinsa may magbuot sa Ginoo hawd man siya, pildi tanan kuyaw”.

Apan wala niya kini himoa, tungod kay ang labing pinaka lisod nga daugon, ang kasing-kasing sa tawo. Bisan pa kuno ikulong ang tawo, dili kini maka tandog sa iyang kasing-kasing, maka kuha sa iyang gugma. Unsa man kining kadaogan nga giplano sa Diyos? Nga kitang tanan, mahisama kaniya ilawom sa iyang dakong gugma ug pagpangga.

Karong mga panahuna, tungod sa kasayon sa pagbungat sa maong mga pulong nga I LOVE YOU, wala na kita makaamgo sa kabug-at sa iyang kahulogan. Nahinumdom ko sa kaniadto nga duna akoy tawong gihigugma nga wala gayud ako tagai sa bisan pudyot nga pagtagad. Pila ka tuig akong nag antos sa paghatag nga walay baylo, ug giantos ko ang kasakit sa iyang pagsalikway. Apan nakaamgo ako nga ang gugma dili gayod mamahimong ipugos, bisan gani ang atong Ginoo, gipadala na ang iyang bugtong anak alang kanato timaan sa iyang dakong gugma, apan daghan pa gihapon ang wala miila kaniya.

Pinaagi sa mga yano ug walay gahom nga mga tawo, sama ni Birhen Maria ug San Jose, ang atong Diyos nga makagagahom, nahimong tawo nga may lawas, sama kanato. Gikuhit ug gigamit sila sa Amahan aron mapaduol kanato, maka relate kanato ug sa matag adlaw nga kita naka sinati ining suliran sa kagutom, kalisod, pagsalikway ug kasakit dili ikalimod nga kining tanan, naagian sa atong Ginoong Jesus ug nga siya ang labaw nga nakahibalo nga lisod daugon ang kasing-kasing sa tawo.

Bisan paman niining tanan, nagpadayon Siya, bisan nahibalo siya sa iyang dangatan, nga ang iyang kamatayon lang ang maka daog batok sa tig-ang kasing-kasing; ug diha sa iyang pag-ula sa iyang balaanong dugo, ang pagpaduol sa Amahan kanato, natuman. (Photos: Luther Lutero)