Alay Kapwa 2022 Gipahigayon sa Matag GKK

Niadtong Marso 6, 2022, unang Domingo sa kwaresma gipahigayon ang launching sa Alay Kapwa 2022 ngadto sa tanang parokya nga sakop sa Archdiocese of Davao kon diin apil ang St. Mary of the Perpetual Rosary ug kini adunay tema nga: Kinabuhing Piniyalan Gifted to Give. Diha sa santos nga misa gipasabot ni Kura Paroko, Fr. Dionisio Tabiliran nga ang Alay Kapwa maoy programa sa tibook simbahan sa Pilipinas panahon sa Kwaresma ug kini panahon dili lang sa paghunahuna sa atong kaugalingon spiritually, apan sa paghunahuna usab sa atong kaigsoonan nga naglisod ug nagpait sa ilang kahimtang tungod sa epekto sa pandemya.

Wala lang kita nagtan-aw sa pakig-uli sa Ginoo kon dili nagtan-aw usab kita sa panginahanglan sa atong mga kaigsoonan panahon sa atong pagpamalandong sulod sa kwarenta ka adlaw. Unsay atong sakripisyo nga mahimo nga atong ikahalad sa atong mga kabos nga kaigsoonan? Hinaot mapakita pud nato kini sa atong mga materyal nga pagtagana ug pagdalit sa atong mga gasa, usa kini sa pagpadayag sa atong social concern ngadto sa atong mga kaigsoonan ug unta ato kining pangusgan panahon sa selebrasyon sa Kwaresma ug Semana Santa.

Sa pagka karon gihimo sa mga GKK Servant Leaders (GSLs) ug Tigpasayon Pundok Banay (TPB) sa ilang tagsa-tagsa ka mga Gagmay’ng Kristohanong Katilingban (GKK) ang kalihokan sa Alay Kapwa. Kini konkreto nga hulagway sa pag-ampo sa Alay Kapwa sa mga panimalay nga ang hugot nga gitutukan ang mga pahimangno nga mao ang paghatag og edukasyon sa magtotoo sa angay nga buhaton sa ilang pagpili panahon sa election diin mahuman sa Miyerkules Santo.

Pinaagi niining pag-ampo sa Alay Kapwa gipadayag sa mga parokyano ang buhat sa kalooy sa mga kaigsoonan ilabina sa mga hugot nga nanginahanglan niini. (Hermie Mapute, SMPR Parish SoCCom)