Unang Face To Face Meeting Sa Adhoc Core Group Gipatigayon

Ang ADHOC Core Group sa Davao Archdiocesan Youth Coordinating Apostolate (DAYCA) nga gipangulohan ni Fr. Cristopher Alcayde, nakapahigayon na og Face to Face Meeting uban ang mga Parish Youth Coordinators ug Leaders niadtong Marso 1, 2022 sa Marian Hall, San Pablo Parish, Juna Subd. Matina, Davao City. Mao kini ang labing una nga face to face meeting sukad nagsugod ang pandemya niadtong 2020. Sulod sa meeting, gihatagan og higayon ang mga youth leaders sa pagpa ambit sa kahimtang sa ilang apostolado ug mga batanon nga sakop sa mga GKK ug parokya.

May pipila nga mipaambit nga bisan pa man sa pandemya, nagpadayon ang kadasig sa pagpangalagad sa mga batan-on ilabi na diha sa pagmugna og mga youth SoCCom ug media team nga nagapahigayon og mga livestreaming Mass sa ilang mga parokya. Aduna pud pipila nga mipaambit nga nawala ang presensya sa mga batan-on sa ilang parokya sukad nagsugod ang pandemya apan nahagit karon sa pagpanawag balik sa mga batan-on nga mangalagad. Kining tanan nga mga pag-paambit nakahatag og inspirasyon sa matag usa nga apil sa meeting, nindut nga higayon nga nakapaminaw sa nagkalain-laing mga kasinatian ug mga hagit sulod sa pandemya.

Sulod usab sa meeting, adunay input nga gihatag ang Youth Director nga si Fr. Cristopher Alcayde diha sa hilisgutan nga “Participation of Catholics in Political Life vs. The Separation of Church and State.” Ang maong input dako nga tabang ug giya sa mga batan-on ilabi na ang mga botante sa umaabot nga eleksyon. Ang maong input pasiuna diha sa pagpadagan sa DACS – Echamp Youth Circles of Discernment sa mga batan-on sa parokya ug GKK.

Sa kinatibuk-an, mapasalamaton ug malipayon ang DAYCA ADHOC Core Group nga ang maong meeting napahigayon ug nagmalampuson. Dalaygon ang Diyos! (Mary Ann Almeria)