Sona 7 sa San Roque Parish, Malabog, Midawat sa Sakramento sa Pagpangalawat

Niadtong ika-13 sa Marso alas otso y medya ang takna sa kabuntagon, gipahigayon sa Sr. Sto. Niño, Saloy ang pagdawat sa unang sakramento sa pagpangalawat. Kini gilangkuban sa duha ka tulunghaan nga sakop sa sona syete nga mao ang Saloy Elementary School ug Pablo Sebuan Elementary School. Ang maong kalihokan gipangulohan ni Fr. Arnold Balaquinto, nga gisalmutan sa 47 ka mga bata nga malipayong midawat sa maong sakramento. “Nalipay ko ug na excite ko sa pagpangalawat”, “Nalipay ko kay naka first communion nako, unya nigaan akong pamati nga nakapangalawat nako”, istorya sa pipila ka mga bata human makadawat sa maong sakramento. “Nalipay ko kay kabalo na sya mangayo ug pasaylo sa Ginoo kon makasala ug lipay pod kaayo ko na honest kaayo sya na ni kumpisal” sigon sa isa ka ginikanan human nakakalawat ang iyang anak. Human sa maong misa di matugkad ang kalipay sa mga ginikanan ug mga kabataan kay diha sa maong pagpangalawat nabati nila nga si Kristo nag uban kanato kanunay. (Heart Bautista | Youth GKK SoCCom)