San Francisco Xavier Nagpahinumdom sa Pastoral Day

Panahon sa misa, gisugdan ni Rev. Fr. Ronald Arcillas, pastoral director sa St. Francis Xavier Seminary ang iyang pamalandong sa pag-ingon nga si San Francisco nagpahinumdom gyod. Sa naghisgot pa sila ug kanus-a ipatigayon ang pastoral day, ilang na amgohan nga sakto ang ilang pamalandong sa petsa nga Marso 12 tungod kini sab ang ika-kwatro syentos nga kasumaran sa canonisasyon ni San Francisco Xavier.

Nagtuyok ang iyang pamalandong duyog sa tema sa pastoral day nga Kristohanong pagpangalagad, pinaagi sa pagkabalaan ug nga kini kanunayng gipahinumdom kanatong tanan pinaagi diha sa Espirito Santo.

Matod pa niya bililhon kaayo kanatong mga Pilipino ang paghinumdom, dakong kalipay ang mahinumdoman: sa atong birthday, anniversary ug uban pang okasyon sa atong kinabuhi ug gani ang uban masuko kung dili mahinumdoman: di mahunumdoman ug text, tawag, mahinumdoman pagpangagda sa pagpangaon, schedule, labi na schedule sa misa (sa ilang mga pari).

Ug gani sa panahon ni Hesus, ang kawatan sa iyang kiliran nagpahinumdom usab nga dili siyang kalimtan sa panahon nga maghari na ang Ginoo. Labi pa ang simbolo sa eukaristiya nga nagpahinumdom kanato kang Hesus.

Sa matag adlaw, kanunay kitang gipahinumdoman sa pagpangalagad pinaagi sa pagkabalaan. Dili kini nanginahanglan ug dagko kaayong sakripisyo, gani ang pagbubo sa bulak o ang pagpakaon sa mga kahayopan sama sa mga iro usa na ka pamaagi sa pagpangalagad.

Niadtong adlawa, sa paghandom sa ilang nagkadaiyang mga pastoral areas dako ang ilang paglaom nga sunod tuig puhon makabalik sa ilang naandan nga pastoral exposure. Ang ebanghelyo usab nagpahinumdom nga unta mahisama kitang tanan sa Amahan natong Langitnon.

Dinasig sa pani-agingnan sa ilang patron nga si San Fancisco Xavier, ato kunong hinomduman nga ang Kristohanong pagpangalagad atong puy-an kay kini pamaagi sa pagkabalaan. (Christine Camus)