Pili-Pinas 2022 Talakayan Series 2: Psyche of the Filipino Voter

Gisugdan ang ikaduhang bahin sa Talakayan Series, sa alas syete sa gabii adtong Marso 11, adlawng Byernes kon diin kini live nga napaminawan sa DXGN 89.9 Spirit FM ug may partisipasyon gikan sa virtual audience via Zoom ug Facebook Live. Usa kini ka panel o round table discussion nga naghisgot sa pagsabot sa natural nga panghuna-huna sa usa ka botanteng Pilipino. Proyekto usab kini sa Archdiocesan Political Education Committee nga gipasiugdahan sa IIREF kon Ignatian Institute for Religious Education and Formation.

Ang mga speaker mao sila Prof. Efren John Sabado usa ka sociologist ug si Prof. Lourdesita Sobrevega-Chan nga mao ang director sa University Research Council sa Ateneo de Davao. Sila maoy naghatag ug siyentipikong mga tubag kung unsa ang lagmit nga rason nga maka impluwensya sa desisyon sa usa ka botanteng Pilipino.

Gipasiugdahan ni Prof. Sabado sa pag-ingon nga ang kultura sa Pilipino naka sentro dinha sa relasyon ug nag tuyok sa emosyon. Gibutngan niyag kabug-aton ang smooth interpersonal relationships of strong family ties. Kini nagpasabot nga relational kayo ang Pinoy ug tungod niana kasing-kasing maoy nagdumala sa pag impluwensya sa desisyon. Bantog nga ang gipangita nga kinaiya sa usa ka kandidato mao nga siya dali maduolan, siya daling makaplagan panahon sa krisis, panahon sa kalisud ug panahon sa kagubot.

Gisegundahan usab kini ni Prof. Chan nga nag naghisgot sa pipila ka resulta sa ilang mga survey nga gipatigayon. Iyang giklaro nga ang usa ka Katolikong botante kabalong mubansay ug mubulag sa iyang pagtuo ug iyang katungdanan. Pananglit na lamang sa iyang mga makita o madungog nga mga dili maayong pulong batok sa mga Katoliko, dili niya kini tagaag kabug-aton tungod, nakita niya ang pagka maayong alagad sa maong lider sa panahon nga siya kinanglanon.
Sa karon nga panahon, dako kaayong tabang ang social media dinha sa paghatag ug impormasyon nga atong gikinahanglan mahitungod sa pag ila sa mga kandidato sa umaabot nga piniliay. Apan kinahanglan gihapon kitang mag maigmat tungod kai wala pa kaayoy kasaligang mga filter kining mga gina butang sa social media ug kung dili kita maabtikong mu bansay, ma lingla kita sa mga dili tinuod nga mga basahon o talan-awon.

Sa katapusan, gipunting nga ang simbahan magmakanunayong relevant kung hisgutan ang politika tungod kai duyog ang gobyerno ug simbahan sa pag bahin-bahin sa mga resources ngadto sa katawhan ug nga walay laing ahensya nga adunay moral obligation ug mission nga sigurohon ang balanse ug patas nga pag hatag ug tabang.