First Communion sa Holy Family Parish

Matag Sabado sa tibuok bulan sa Pebrero gipahigayon sa Holy Family Parish, sakop sa Brgy. Dumoy ug Baliok ang First Communion sa mga bata nga nag-edad ug nwebe anyos pataas. Ang aktibidad gisugdan pinaagi sa pagpanudlo bahin sa katekisis nga gipanguluhan sa mga katekista kauban sila Sis.Sylvia Lazaro, Sis.Genevieve Cuenca, Sis. Auring Eso, Brod.Ep-Ep Cuenca ug Bro.Randy Malimban ug uban pang mga katekista nga nagtabang sa maong aktibidad. Paghuman sa katekismo, gisunod ang pagpangumpisal kauban ang mga Marist Fathers nga sila Fr. Arnel Bajo Schp., Fr.Dodong Cantilan Schp., Fr.Dindo Pescos Schp. ug si Fr.Roger Duhaylungsod, DCD ang kura paroko sa Sagrada Pamilya.

Matag Sabado sa dili pa muabot ang alas syete sa buntag , ang mga partisipante musulod sa simbahan alang sa pagpangandam sa ipahigayon nga katekismo bago sila makadawat sa Sakramento sa Pagpangalawat.

Nikabat sa 167 ang mga kabataan nga nakadawat sa First Communion ug kini ila gayong gikalipay kay dugay-dugay na pod silang naghandom nga makadawat sa balaang lawas ni Kristo. Makita usab sa mga dagway sa nga ginikanan ang dakong kalipay nga nakadawat na gayod ilang mga anak sa Balaang Yukaristiya.

Pinaagi sa paghan-ay sa mga rekisitos ug superbisyon sa kura-paroko nga si Fr. Roger Duhaylungsod, DCD nagmalampuson gayod ang maong aktibidad.

Kauban usab sa among paningkamot ang mga GKK Servant leaders nga nag-awhag sa mga bata nga mudawat sa First Communion.

Matod ni, Vionne Bautista, estudyante gikan sa usa ka pribadong tulunghaan “sa dihang nag -grade 4 nako, dako ang akong pagpasalamat nga nakab-ot na nako ang pangandoy sa pagdawat sa Sakramento sa Kompisal ug Sakramento sa Pangalawat. Ako gayod nga nasayran ug nabati ang presensiya sa Ginoo.”

Mapasalamaton ang mga ginikanan nga sa katapusan, nakadawat na gayod ug First Communion ilang mga anak nga maoy mahimong mas makahuluganon matag tambong nila sa misa. (Reynaldo Malimban)