“Bag-Ong Panaad: Ang Pagsulod Sa Mga Pangulo Sa Disierto Sa Kamingawan”

Nanumpa sa ilang mga panaad ang 59 ka mga Pangulo Sa Katilingban o mga giilang PSK sa gipahigayon nga Renewal Recollection sa St. James the Apostle Parish atong March 6, 2022.

Ang renewal nahitabo pagkahuman sa ikaduhang Misa sa buntag, unang Domingo sa Kwaresma, nga gipangulohan ni Rev. Fr. Rolando O. Mandreza, Kura Paroko.

Gisugdan ni Fr. Mandreza ang iyang pamulong mahitungod sa Ebanghelyo nga gikan sa LUKAS 4:1-13, ang pagtimbaya sa pagdawat sa mga katilingban, tungod kay kita anaa na sa alert level 1. Kini nagapasabot nga gitugutan na ang tanang gathering in FULL CAPACITY. Mao nga, kadtong Domingoha ang unang Domingo nga tag tulo na katao ang makalingkod sa matag bangko. Iyaha usab nga gipahinumduman ang tanan sa pagpadayun sa pagsuot sa facemask ug pagsunod sa uban pang health protocol sa gathering.

Gihatagan gayod ni Fr. Mandreza og importansya sa pagpalayo sa mga butang nga makapuno sa huna-huna ug kasingkasing, mga butang nga nagahatag ug tentasyon sa kinabuhi. “Magpalayo sama pag-adto sa disierto, sa disierto sa kamingawan, arun kita makapamalandong sa mga butang nga maayo ug makita ang butang nga dili maayo”.

Gipahinumdoman ni Fr. Mandreza ang katawhan ilabina ang mga Pangulo arun sa pagpuasa, sa paghatag ug limos, pagpugong, ug sa pag-ampo. Gihatagan niyag importansya ang pagsulod sa disierto sa kamingawan aron kini makausab unta sa mga kasingkasing, nga makakita kita ug klaro sa maong kahimtang ug kung asa gayud ang kapadulngan ning atong kinabuhi.

“Diha sa kamingawan, mahatagan natog atensyon dili lang ang atong kaugalingon apil usab ang panginahanglan sa uban,” pulong niya. Ug midungag siya sa pag-ingon, “Mao kana ang katuyuan nianang pag-ampo, pagpuasa ug ang bunga niini mao ang paghigugma sa Diyos, paghigugma sa imong isigkaingon diha sa paghatag ug limos, sa pagpaambit.”

Kining mga pulong naghatag gayud ug kadasig sa mga PSK, arun sa pagpadayun sa ilang misyon nga ilang nasugdan ug naangkon, ug sa gasa nga ilang nahiaguman ug nadawat. Kini nakapaamgo kanila nga magpadayun sa pagpanirbisyo kay ila gayung nabati ang kamaayo sa Ginoo ug nga sila nahigugma pag-ayo sa atong buhing Diyos.

Pagkahuman sa maong misa, mipadayun ang mga PSK sa RENEWAL diin nahitabo ang ang pagpanumpa. Kini gipangulohan ni Juanita Labriga, ang PSK Coordinator. Girepresentahan sa mga Pangulo Sa Katilingban ang nagkadaiyang GKK nga sakop sa St. James the Apostle Parish inubanan ni Fr. Mandreza sa Renewal Recollection. Kini natapos nga malampuson, malipayon ug puno sa pagpasalamat. Kini usa gayod ka maayong balita alang sa tanan. (Mark Obed Quintano & Angelo Marqueza | SJAP SocCom)