Ang Matuod nga Gugma sa Dios

Ika-limang Domingo sa Kuwaresma (April 3, 2022)
Is. 43:16-21 / Ps 126:1-3, 4-5, 6 / Phil 3:8-14 / Jn 8:1-11

Ang gugma sa Dios sa iyang katawhan naghingapin gayod, ilabina diha sa pagpakatawo sa iyang bugtong Anak. Ang Dios nga maoy unang nahigugma sa tawo bisan kon unsa siya ka makasasala.

Ang atong ebanghelyo karong ika-lima nga Dominggo sa kwaresma nagsaysay kabahin sa usa ka babaye nga hisakpan nga nanapaw. Ug matod pa nga ila kining gidala ngadto kang Jesus aron aduna silay mahimong sumbong batok kaniya. Ang pagkundina sa sala sa usa ka babaye wala kini nahimong sentro apan sa laraw sa mga Pariseo nga buot mobitik kang Jesus pinaagi sa ilang malisyosong plano.

Ang Dios nga nasayod sa kinailadman sa tawo nakita ang ilang daotang intensyon batok Kaniya. Nahimong napadayag ni Jesus ang dakong gugma sa Dios ngadto sa usa ka makasasala. Ang Dios mihatag ug panahon aron sa pagbag-o sa kinabuhi sa usa ka makasasala.

Kon atong lantawon pag-ayo ang atong kasinati-an kita nahisama sa usa ka babaye nga gidala aron hukman tungod sa atong mga sala nga nahimo. Apan ang Dios nagmaluluy-on kanato pinaagi sa iyang mga grasya nga iyang gipadagayday diha sa atong kinabuhi.

Kon ato pa gayong palawoman ang atong pagpamalandong, ang simbolo sa usa ka babaye diha sa atong ebanghelyo nagpunting usab ngadto sa atong unang mga ginikanan nga nakasala tungod sa ilang kamapahitas-on nga gusto na silang mahisama sa Dios. Apan bisan pa man niana nga kasinati-an nga diin ang Dios nagpahamtang sa silot, apan Siya usab nagsaad nga luwason sila sa kaulipnan sa ilang mga sala. Ang Dios nga nagmahigugmaon bisan pa sa sinugdanan.

Karon atong isentro ngadto ang atong mga mata sa mata sa Dios nga nahimong nagmaluluy-on diha sa atong pagkamakasasala ug naghatag kanato sa panahon aron magbag-o kita sumala sa iyang dagway ug kasamahan. Atong paningkamotan nga ang atong paghukom ngadto sa uban ato unta nga gamiton ang hukom sa atong Ginoo nga nagmaluluy-on ug nagmahigugmaon sa mga makasasala.

Sa katapusan atong hinomduman kanunay ang giingon sa atong Ginoo nga “lakaw ug ayaw na pagpakasala” kini nagpadayag nga ang Dios naghatag ug panahon nga maghinulsol kita sa atong mga sala apan ayaw dugay-dugaya kay basin unya nga makabsan kita sa panahon ug dili na kita makahimo sa pagbag-o sa atong kinabuhi. (Bro. Soren Abellanosa)