Panaghiusa ug Pakighiusa alang sa Kinabuhi ug Pamilya: Bugtong Tubag sa Nagpadayon nga Pandemiya

Taliwala sa nagpadayong pandemiya sa coronavirus, gidasig ang mga pamilya nga magkahiusa ug makighiusa aron magmalig-on.

Mao kini ang tema sa kasaulogan sa PRO-LIFE MONTH karong bulan sa Pebrero 2022 alang sa Arkidayosis sa Dabaw.

Sa pakighinabi sa spiritual director sa Family and Life Apostolate nga si Rev. Fr. Orlando Angelia atol sa programang AMBIT GN sa DXGN 89.9 Spirit FM, iyang gibutyag nga kinutlo kini sa nasudnong tema sa pinulungan nga Tagalog ug gihubad ngadto sa Binisaya.

Gipasabot ni Fr. Angelia nga ang Pro-life mao ang opposite sa Pro-Choice sanglit ang pro-choice nagdepende sa kabubut-on sa tawo apan ang Pro-Life nagsalig ug nahisubay sa kabubut-on sa Ginoo.

“So ang Pro-choice mao na ang advocacy sa mga tawo, nga murag anything goes, whatever they want, sama sa choice nga magpa-abort sila, gusto sila ug same sex union,” siya namahayag, “ang Pro-life is always in line with the heart and mind of the church… nag-base na siya sa pagtoong Katoliko nga ang kinabuhi sagrado gikan sa sabakan ngadto sa natural nga kamatayon.”

“Ang pro-life is a Catholic Advocacy to promote life, to protect life and to foster life,” gipasabot ni Fr. Angelia.

Ang maong baruganan sa Katolikong Simbahan, siya midugang maoy angayang tan-awon usab sa mga midagan nga mga kandidato kung naghambin ug nagsuporta ba sila alang sa kinabuhi.

“So kini man gud nga pagka-pro-life, is integral, dili lang na siya one-sided, ang pagtan-aw gyud na sa kinatibuk-an; dili lang kay kini murag makalusot ning maong kandidato kay anti-abortion siya pero uyon man pud siya ug same sex union, nag-uyon man pud siya ug divorce,” busa alang kang Fr. Angelia nga kinahanglan nga sutaon gayud kining tanang mga baruganan usab sa mga kandidato nga gusto magpapili sa umaabot nga eleksyon.

Midugang si Fr. Angelia nga pinaagi sa pagpamalandong sa maong tema, dunay giandam nga napulo ka mga kalihukan alang sa kasaulogan sa tibuok bulan sa Pro-Life.

Una, mao ang pagsab-it ug tarpaulin sa matag parokya kabahin sa kasaulogan ug sa tema;

Ikaduha, mao ang poster making contest diin giaghat ang mga parokya nga magpadala ug pamilya nga sakop sa Family and Life Apostolate nga mohimo niin, “Kung pwede, ang whole family moapil…(isip) usa ka family activity, i-encourage ang mga bata nga moapil sila,” si Fr. Angelia nagkanayon.

Ikatulo, mao ang paghimo ug 3-minute video making contest kalabot sa tema.

Ika-upat dunay virtual conference nga pagahimoon nga dunay pakiglambigit tali sa DXGN 89.9 Spirit FM.

Ika-lima, mao ang pormal nga pag-abli sa Pro-Life Month pinaagi sa programang Kahayag sa Pamilya sa Pebrero 6, 2022, alas-7 sa gabii sa DXGN 89.9 Spirit FM.

“So didto pamalandongan nato ug balik kining maong tema,” siya midugang, “ naay mopaambit niana, unsa gyud ang relevance ug kamahinungdanon niining maong tema sa pamilya karon ug pagprotekta sa kasagrado sa kinabuhi.”

Ika-unom, ikaduhang Domingo sa bulan, sa Pebrero 13, mao ang pagtuki sa pipila ka mga pro-life nga mga mananambal kung unsaon pag-amping, pag-amuma sa kinabuhi, “sa point of view sa mga doctors.”

Ika-pito, mao ang pagpadayon sa paghisgot sa tema ug uban pang mga aspeto sa pagpanalipod sa kinabuhi sa Pebrero 20 ug 27 sa mga FLA workers sa Sacred Heart Vicariate sa Calinan ilabi na sa ilang mga kasinatian sa programa sa Kahayag sa Pamilya.

Ika-walo, gidasig ang tanan sa pagpangadye sa Pag-ampo alang sa Kinabuhi ug Rosaryo alang sa Kinabuhi, “kabalo na man niini ang mga parokya kay ginahimo man kini matag tuig,” si Fr. Angelia nagkanayon.

Ika-siyam mao ang pag-ampo alang sa mga wala gipakatawo, “ilabi na kadtong mga parokya nga dunay lubnganan alang sa mga UNBORN, “dunay pagahimoon nga blessing after siguro sa isa sa mga masses.”

Duna usab pagbendisyon sa mga mabdos, “kay ang kinabuhi nagsugod man sa sabakan, ang sabakan o womb, is the first human environment. Mahinungdanon kini, matud ni Fr. Angelia nga dunay panalangin sa mga nagdala sa kinabuhi, ang gitahasan sa Ginoo nga magdala sa kinabuhi sulod sa siyam ka bulan.

Ang ika-napulo mao ang pagbendisyon sa mga magtiayon ug mga pamilya, “so before the end of February dunay pagahimoon nga pagpanalangin mga minyo ug sa tibuok pamilya.