OLMMP: First Communion gipahigayon sa 459 Communicants

Usa sa mga epekto sa pandemya sulod sa duha ka tuig mao ang pagkansela sa mga tinuig nga mga kalihukan diha sa atong simbahan ug mga tulunghaan tungod sa pagtuman sa mga protocols. Ug usa niini nga naapektuhan mao ang usa sa mga importante nga yugto sa espirituhanong kinabuhi sa atong mga kabataan nga nag-edad ug siyam, Grade 3 students, nga mao ang First Communion.

Nahibaw-an nga tungod sa COVID19, gibawalan ang mga kabataan nga mugawas sa tagsa tagsa nga panimalay ug giawhag kini sa pagtuman sa Stay-at-Home policy sa atong nasud aron dili sila mahimong biktima sa maong sakit. Ug gipatuman usab sa DEped ang Distance Learning; ug ang tanang aktibidades nga adunay kalambigitan sa mga kabataan pagabuhaton lamang kini sa panimalay pinaagi sa paggiya sa ilang mga ginikanan.

Ug karon nga anaa na kita sa ikatulo ka tuig sa pandemya, na kung diin nadawat na sa kadaghanan ang New Normal sama sa pagsuot ug face masks, social distancing ug paggamit sa mga sanitizers kung muadto sa publiko nga adunay daghang tawo. Nagplano na dayun ang Our Lady of Miraculous Medal Parish (OLMMP) sa Indangan nga magpahigayun ug First Communion. Ug kini gipangunahan sa atong mga Pangulo sa Pagpanudlo (PSP) nga maoy naningkamot sa pagsuroy, pagbisita sa mga panimalay sa ilang tagsa tagsa ka GKK aron malista ug matapok ang mga kabataan nga wala pa nakasinati sukad sa Pagkaun sa Lawas ni Kristo. Busa naadtong February 1 hangtud 3, 2022, sa tulo ka adlaw gibahin ang mga partisipante sa unom ka zona. Ang zone 1 ug 2 sa Feb. 1 nga adunay 164 communicants, ang zone 3 ug 4 sa Feb. 2 nga adunay 160 communicants ug ang ikatulo mao ang zone 5 ug 6 sa Feb. 3 nga adunay 135 ka communicants.

Samtang nagtapok ang mga kabataan sa sulod sa Simbahan, mabati gayud ang excitement sa tanan ilabi na ang mga ginikanan nga usa ka adlaw maoy naggiya sa ilang mga anak arun sa kalampusan sa maong okasyon. Gisugdan kini sa usa ka orientation sa alas siyete sa buntag, misunod ang katekesis alang sa mga kabataan nga gihatag sa mga maabtikong Katekista, unya misunod ang pagpangumpisal ug natapos kini sa Santos ng Misa nga gipangunahan ni Fr. Jesus Samaniego, ang abtik ug kugihan nga Kura Paroko, alas tres sa hapon.

Diha sa Homiliya ni Fr. Samaniego, gipadayag niya ang dili masukod nga kalipay samtang naghatag ug bendisyon sa mga kabataan. Dako usab kaayo iyang pasalamat sa mga GSL ilabi na ang mga PSP nga maoy nanglimbasog nga ang tanan mahimong posible; ug labaw sa tanan sa mga ginikanan sa pagtuman sa ilang obligasyon isip miyembro sa kristohanong katilingban diha sa espituhanong panginahanglan sa ilang mga anak. Bisan paman sa ka delikado sa panahon na kung diin alert 3 level sa Davao City, wala kini nahimong babag aron magmalampuson ug mabungahon ang maong First Communion sa 459 nga mga Kabataan sa Our Lady of Miraculous Medal sa Indangan. Dalaygon ang Diyos sa maong Katumanan! (Marilou A. Luzon, SOCCOM-OLMMP)