Mga kandila gipanalanginan, ika-11 nga Pyesta sa Virgen delos Remedios

Dungan sa pagsaulog sa ika 11 katuig nga kapistahan sa Virgen delos Remedios sa Crossing Bayabas,Toril mao ang kapistahan sa Ginoo nga gihalad didto sa templo. Kining pangilin gitawag nga Kapistahan sa Kandelarya, diin ang mga kandila pagasindihan ug pagapanalanginan. Kining mga kandila nagtimaan kang Kristo ang kahayag sa kalibutan.

Sa pagsaulog sa Santos nga Misa, nga ang Ebanghelyo sumala ni San Lukas, gipasabot sa atong Arsobispo Romulo G. Valles, D.D. nga ang sentro sa pagsaulog mao ang Mahal nga Birhen Maria nga maoy naghalad sa Batang Hesus didto sa templo ug sa matag higayon nga kita moduol kang Maria sa samang paagi niduol usab kita sa atong Ginoo pinaagi kang Maria.

Iya usab gilakbitan nga sa samang adlaw gisaulog ang “World Day for Consecrated Persons”. Adlaw kini sa pagghandum ug pag-ampo alang sa mga kaigsoonan natong mga relihiyoso, madre, pari, ug brothers.

Sa iyang paghisgot niini, gidayeg ug gipasalamatan sa atong Arsobispo ang Kura Paroko nga si Fr. Anthony Silvosa sa talagsaong pamaagi sa pagsaulog sa kapistahan sa kandelarya ingon man ang daghang parokyano nga niduyog sa pagsaulog sa kapistahan. Siya nagaawhag sa matag usa sa pagpadayon sa pagpanalangin sa mga kandila una sugdan ang Santos nga Misa sa mga kapistahan pang umaabot. Viva Maria! Viva Hesus! (Lilibeth Sancover)